EDUTECH

Azərbaycanlı şagirdlər Bolqarıstanda keçirilən İnformatika üzrə Avropa Gənclər Olimpiadasının üçüncü olublar.

Xeberler.az bildirir ki, bu barədə Azərbaycanın Bolqarıstandakı səfirliyindən məlumatında deyilir.

7-13 sentyabr tarixində Sofiya şəhərində İnformatika üzrə Birinci Avropa Gənclər Olimpiadası keçirilib. Tədbirin məqsədi gənclərin informasiya texnologiyaları sahəsinə marağının təbliğ edilməsi və Avropada rəqabət qabiliyyətli proqram təminatının inkişafının təşviqi, eləcə də gənclər arasında informasiya texnologiyaları sahəsində ən yaxşı istedadların müəyyən edilməsidir.

Olimpiada Bolqarıstan Prezidenti Rumen Radev, Avropa Komissiyasının (AK) Təhsil, mədəniyyət, gənclər və idman üzrə Komissarı Tibor Navraçiç və AK-ın Rəqəmsal iqtisadiyyat və cəmiyyət üzrə Komissarı Mariya Qabrielin himayəsi altında keçirilib. Olimpiada Avropa Parlamentinin Bolqarıstandan olan deputatları tərəfindən dəstəklənir və İnformatik üzrə Beynəlxalq Olimpiadanın standart və qaydalarına riayət edir.

Yarışlara Bolqarıstanın Təhsil və Elm Nazirliyi, Sofiya şəhər Bələdiyyəsi, Müqəddəs Kliment Oxridski adına Sofiya Universiteti və elm və texnologiya parkı olan Sofiya Texnoloji Parkı (Sofiya Tech Park) ev sahibliyi edib. Tədbirin 8 sentyabrda baş tutan açılış mərasimində Bolqarıstan prezidenti R.Radev, AK-ın Rəqəmsal iqtisadiyyat və cəmiyyət üzrə Komissarı M.Qabriel və BR təhsil naziri Krasimir Vılçev çıxış ediblər. AK-ın Təhsil, mədəniyyət, gənclər və idman üzrə Komissarı T.Navraçiçin olimpiada təşkilatçıları və iştirakçılarına müraciəti oxunub.

Mərasimdə Bolqarəstan prezidenti R.Radev rəqəmsal texnologiyanın müasir iqtisadiyyatın ən sürətlə inkişaf edən sektoru olduğunu qeyd edib, gənc nəslin erkən yaşlardan yeni texnologiyalara çıxış imkanını yüksək qiymətləndirib və mürəkkəb alqoritmləri inkişaf etdirmək, onları xüsusi proqram dilinə çevirmək və əməliyyat sistemlərinin tələblərinə uyğunlaşdırmaqla gənclərin texniki tərəqqiyə nail olmaqla yanaşı, həmçinin insan davranış modelini yaratdığını və gələcəyi idarə etdiyini söyləyib. AK-ın Rəqəmsal iqtisadiyyat və cəmiyyət üzrə Komissarı M.Qabriel cəmiyyətdə və iqtisadiyyatda rəqəmsal dəyişikliklərin çağırışlarına cavab verdiklərinə görə olimpiadada iştirak edən gənclərə təşəkkürünü ifadə edib, bu gündən etibarən onların yeni missiyasının – gələcəyin səfirləri olduğunu bildirib. Çıxışında təhsil və elm naziri K.Vılçev olimpiada iştirakçılarının gələcəkdə əldə edəcəyi nailiyyətlərin təkcə komputerlər üçün xüsusi proqramlar deyil, cəmiyyətin gələcəyinin inkişafı ilə bağlı olacağını əlavə edib.

Olimpiadada Azərbaycan, Bolqarıstan, Rusiya, Belçika, Ukrayna, Gürcüstan, Macarıstan, Polşa, Yunanıstan, Kipr, Fransa, Estoniya, Sloveniya, Rumıniya, Bosniya və Herseqovina, Serbiya, Xorvatiya, Makedoniya, Latviya, Litva və Moldovadan olmaqla, 22 ölkədən 89 şagird iştirak edib.

Olimpiadada ölkəmizi Abutalıb Namazov (Fizika, Riyaziyyat və İnformatika təmayüllü lisey), Hüseyn Hacıyev (Bakı Avropa liseyi), Murad Eynizadə (Lənkəran şəhər 4 saylı orta məktəb), Əziz Hüseynov (Gəncə şəhər 26 saylı orta məktəb) təmsil ediblər.

Yarışların ilk günündə iştirakçılar 4 saat ərzində 3 suala cavab tapmalı idilər. Bu mərhələdə maksimum xal 300 idi. Olimpiada çərçivəsində iştirakçılar informasiya texnologiyaları sahəsində biliklərini nümayiş etdirməklə yanaşı, tədbirin proqramına uyğun olaraq Plovdiv şəhərinə səfər edərək şəhərin tarixi və mədəni irsini kəşf etmək imkanı əldə ediblər.

Bağlanış mərasimində qaliblər arasında mükafatlar paylanılıb və növbəti Avropa Gənclər Olimpiadasına ev sahibliyi edəcək ölkə elan edilib. Mərasimdə 8 iştirakçı qızıl, 15 iştirakçı gümüş və 22 iştirakçı bürünc medala layiq görülüb. Komandamızın üzvü, Fizika, Riyaziyyat və İnformatika təmayüllü liseyin 9-cu sinif şagirdi Abutalıb Namazov ölkəmizi layiqincə təmsil edərək olimpiadanın bürünc medalına layiq görülüb.

Sofiyaya səfər çərçivəsində Azərbaycanın Bolqarıstandakı səfirliyində olimpiadada ölkəmizi təmsil edən komandanın üzvləri ilə görüş keçirilib. Səfir Nərgiz Qurbanova səfirliyin fəaliyyəti, Azərbaycan-Bolqarıstan münasibətləri barədə məlumat verərək şagirdlərin olimpiadada iştirak, ölkə ilə bağlı təəssüratları ilə maraqlanıb. Səfir həmçinin, ölkələr arasında təhsil sahəsində əməkdaşlıqdan bəhs edərək bu əməkdaşlıq üçün geniş potensialın olduğunu bildirib.

Xeberler.az