İNNOVASİYA VƏ STARTAP

Azərbaycan Texniki Universiteti (AzTU), AzInTelecom və Startap Azərbaycan tərəfdaşlığı ilə təşkil olunan SmartSolutions Hackathon 2026 tədbirinin ilk günü AzTU İnkubasiya Mərkəzində uğurla baş tutub.

Xeberler.az xəbər verir ki, tədbirin açılış mərasimində çıxışlar dinlənilib, iştirakçılara hackathonun qaydaları və proses barədə ətraflı məlumat verilib.

Açılışda çıxış edən Osman Gündüz iştirakçılara uğurlar arzulayaraq innovasiya və startap ekosisteminin inkişafının əhəmiyyətini vurğulayıb. Daha sonra AzInTelecom MMC-ni təmsil edən İctimaiyyətlə Əlaqələr bölməsinin rəhbəri Amin Nəzərli hackathonun əhəmiyyətindən bəhs edib. Mentorlar Fərid Kazımov və Orxan Əhmədov isə iştirakçılarla ilkin tövsiyələrini bölüşüblər.

Tədbir çərçivəsində AzTU İnkubasiya Mərkəzinin koordinatoru Azad Musayev tərəfindən hackathonun ümumi qaydaları və qiymətləndirmə meyarlarına dair təqdimat keçirilib. Komandalara problem seçimi mexanizmi və elektron sistem üzərindən seçim prosesi izah olunub.

Komandalar xüsusi platforma vasitəsilə real vaxt rejimində problemlərini seçərək uyğun gözlənilən nəticələr (outputlar) ilə tanış olublar. Onlara təqdim etdikləri MVP və pitch zamanı bu nəticələrin nəzərə alınmasının vacibliyi bildirilib.

Hackathonun birinci günü çərçivəsində komandalar süni intellekt, fintech, kibertəhlükəsizlik və digər istiqamətlər üzrə müxtəlif layihələr üzərində işləməyə başlayıblar. Gün ərzində iştirakçılar mentor dəstəyi ilə həllərini inkişaf etdirərək növbəti gün üçün təqdimatlara hazırlaşıblar.

Qeyd edək ki, hackathonda iştirak edən komandalar Azərbaycan Texniki Universiteti (AzTU) ilə yanaşı Türkiyə-Azərbaycan Universitetinin (TAU) tələbələrindən formalaşıb.

Hackathonun ikinci günündə komandalar hazırladıqları layihələri tamamlayaraq münsiflər heyəti qarşısında təqdim edəcək və qaliblər müəyyən olunacaq.