STARTAP AZƏRBAYCAN

Məlumat verdiyimiz kimi, dünən Lənkəran şəhərində Startap Azərbaycan layihəsənin nümayəndələri tələbələrlə görüşüb.

Xeberler.az-ın məlumatına görə, tədbir Lənkəran Dövlət Universitetində baş tutub.

Görüşdə universitetin tələbələri və startap sahəsi ilə maraqlanan gənclər, həmçinin Lənkərana yaxın bölgələrdən də bu sahə ilə maraqlanan şəxslər də iştirak edib.

Tədbiri giriş sözü ilə Lənkəran Dövlət Universitetinin rektoru vəzifəsini icra edən professor Nizami Yusubov açıb.

Nizami Yusubov qonaqları təqdim edərək deyib ki, son dövrlərdə startap sahəsi , internet biznes ölkəmizdə də inkişaf etməyə başlayıb.

O, bu görüşü yüksək qiymətləndirib.

Professor qeyd edib ki, belə görüşlər tələbələr üçün faydalıdır.

Nizami Yusubov universitetin tələbələrinin ideyalarını dəstəkləyəcəklərini vurğulayıb.

Tədbirdə Azərbaycan İnternet Forumunun rəhbəri Osman Gündüz Startap Azərbaycan haqqında və ölkədə startap ekosisteminin inkişafı barədə məlumat verib.

O, Rabitə və Yüksək Texnologiyalar Nazirliyi, İT-nin İnkişafı Dövlət Fondu və digər rəsmi qurumlar və şirkətlər tərəfindən dəstəklənən Startap Azərbaycan layihəsinin əsas məqsədləri, layihə çərçivəsində hazırda davam edən müsabiqə qaydaları, Startap Günləri haqqında danışıb.

Rabitə və Yüksək Texnologiyalar Nazirliyi yanında İT-in İnkişafı Dövlət Fondunun nümayəndəsi Emin Baxşəliyev çıxış edərək Dövlət Fondunun həyata keçirdiyi layihələr, qrant müsabiqələri və qarşıda gözlənilən tədbirlər haqqında məlumat verib.

Fondun rəsmisi layihələrin qrant müsabiqəsində iştirakı ilə bağlı məqamlara məqamlara aydınlıq gətirib.

Görüşdə həmçinin ölkədə tanınmış startapçılar və İT sahəsi üzrə mütəxəssislər , startapçı Orxan Əhmədov, startapçı, AMEA Elm və Texnologiya Parkının aparıcı mütəxəssisi Rəşid Əliyev və elektron ticarət üzrə ekspert, Shopera.az -ın təmsilçisi Rəşad Camal çıxış edərək öz təcrübələri və startap sahəsindəki mövcud trendlərlə, internet biznes və elektron ticarət sahəsindəki vəziyyətlə bağlı fikirlərini tələbələrlə bölüşüb.

Görüşdə Lənkəran Dövlət Universitetinin professor müəllim heyətinin nümayəndələri, xüsusilə də tələbələr çıxış edərək onları maraqlandıran sualları səsləndirib.

Toplantı diskussiya və tələbələrin sual-cavabları ilə davam edib.

Tədbirlə bağlı bütün fotolar Startap Azərbaycan-ın rəsmi Facebook səhifəsində yerləşdirilib.

Xəbər verdiyimiz kimi, Startap Azərbaycan bundan əvvəl Gəncədə və Mingəçevirdə belə görüş təşkil edib.

Startap Azərbaycan Layihəsinə Rabitə və Yüksək Texnologiyalar Nazirliyi , İT-nin İnkişafı Dövlət Fondu və Yüksək Texnologiyalar Parkı dəstək verir.

Startap Azərbaycan-ın Akademik partnyoru ADA Universitetidir. ATL Group, SİNAM, Neuron Technologies, SUP Accelerator, NEXT STEP İnnovasiya Mərkəzi və Cybernet şirkətləri Startap Azərbaycan-a dəstək verir və sponsorluq edirlər.

Məltəm Talıbzadə