İNNOVASİYA VƏ STARTAP

Startap Azərbaycan Təşkilat Komitəsindən Xəbərlər.az-a verilən məlumata görə, bu gün müsabiqəyə qeydiyyat başa çatır.

Martın 1-dən başlayan müsabiqəyə indiyədək 18 startap layihəsinin təqdim edildiyi bildirilir.

Qeyd edək ki, layihələrin müsabiqəyə buraxılmasını Təşkilat Komitəsi həll edəcək.

Məlum olduğu kimi, Startap Azərbaycan TK-nın qərarına görə bu il yalnız fəaliyyətdə olan, ilkin versiyası hazır olan layihələr (saytın və ya mobil tətbiqin demo versiyası olan, yalnız ideyadan, prototipdən ibarət olmayan layihələr) müsabiqədə iştirak edə biləcək.

TK-dan bildirilib ki, odur ki, yalnız ilkin versiyası olan, qaydalara uyğun olaraq təqdim edilən layihələr müsabiqəyə buraxılacaq və 1-ci səsverməyə qəbul olunacaq. Bunun əsasında yarımfinalçılar seçiləcək.

TK-nin məlumatında yaxın vaxtlarda iştirakçılar üçün beynəlxalq təlimçinin iştirakı ilə təlimlərin keçirilməsi, universitetlərdə startap görüşlərinin, həmçinin investorlarla görüşlərin təşkil edilməsi də nəzərdə tutulur.

Yekun təqdimat mərasiminin isə may ayında keçirilməsi planlaşdırılır.

Startap Azərbaycan layihəsinin əsas məqsədi milli startupların üzə çıxarılması və inkişafına dəstək vermək, bu istiqamətdə maarifçilik işləri həyata keçirmək, ölkədə internet biznes mühitini yaxşılaşdırmaq, investorların bu sahəyə diqqətini artırmaq və innovativ ideyaların uğurlu biznes sahəsinə çevrilməsinə yardım etməkdir.

 Startap Azərbaycan Layihəsinə Rabitə və Yüksək Texnologiyalar Nazirliyi , İT-nin İnkişafı Dövlət Fondu və Yüksək Texnologiyalar Parkı dəstək verir. Startap Azərbaycan-ın Akademik partnyoru ADA Universitetidir. ATL Group, SİNAM, Neuron Technologies, SUP Accelerator, NEXT STEP İnnovasiya Mərkəzi və Cybernet şirkətləri Startap Azərbaycan-a dəstək verir və sponsorluq edirlər. 

Məltəm Talıbzadə