STARTAP AZƏRBAYCAN

Məlumat verdiyimiz kimi, Startap Azərbaycan 2016 tədbirləri başa çatmaq üzrədir.

Təşkilat Komitəsindən Xeberler.az-a verilən məlumata görə, sabah Holiday İnn otelində yekun təqdimat mərasimi və ənənəvi Startap Azərbaycan Milli Konfransı keçiriləcək.

Bildirilib ki, konfransın mövzusu “Azərbaycanın startap ekosistemi : problemlər və perspektivlər“ olacaq.

Qeyd edək ki, konfransda  Rabitə və Yüksək Texnologiyalar nazirinin müavini Elmir Vəlizadə, İT-nin İnkişafı Dövlət Fondunun direktoru Elçin Zeynalov, Azərbaycan İnternet Forumunun prezidenti , Startap Azərbaycan Təşkilat Komitəsinin üzvü Osman Gündüz və digərlərinin çıxışı gözlənilir.

Konfransın proqramı və spikerlər barədə buradan daha ətraflı məlumat ala bilərsiniz.

Yekun təqdimat mərasimində Startap Azərbaycan 2016 layihəsinin yekunları və milli startap müsabiqəsinin nəticələri haqqında təqdimatlar olacaq.

 Həmçinin müsabiqəsinin qalibləri elan olunacaq, onlara mükafatlar və qiymətli hədiyyələr təqdim olunacaq.

Qaliblərin qısa müddətli təqdimatları da nəzərdə tutulur.

Təşkilat Komitəsindən verilən məlumata görə, bu il də ekspertlərin 2 mərhələli qiymətləndirməsindən sonra bir neçə komanda finala çıxıb. Komandaların adları isə hələlik açıqlanmayıb.

Məlum olduğu kimi, bu il müsabiqəyə 45 startap müraciət etsə də, Startap Azərbaycan qaydalarına uyğun olan 20 startap yarışmaya buraxılıb.

Məlumat verdiyimiz kimi, mayın 26-da Startap Azərbaycan 2016 yarımfinalçılarının 2-ci qiymətləndirilməsi keçirildi. Yüksək Texnologiyalar Parkında baş tutan tədbirdə 10 yarımfinalçı komanda ekspertlər qarşısnda təqdimat etdi.

Startap Azərbaycan Layihəsinə Rabitə və Yüksək Texnologiyalar Nazirliyi , İT-nin İnkişafı Dövlət Fondu və Yüksək Texnologiyalar Parkı dəstək verir.

Startap Azərbaycan-ın Akademik partnyoru ADA Universitetidir.

ATL Group, SİNAM, Neuron Technologies, SUP Accelerator, Youth İnc., NEXT STEP İnnovasiya Mərkəzi və Cybernet şirkətləri Startap Azərbaycan-a dəstək verir və sponsorluq edirlər.

Məltəm Talıbzadə