SÜNİ İNTELLEKT VƏ DATA

2030-cu ilə qədər qlobal süni zəka bazarının 1,81 trilyon dollar həcmində böyüyəcəyi və əsasən səhiyyə, maliyyə, bankçılıq və ödəniş sistemlərində 133 milyon yeni iş sahəsi yaradacağı gözlənilir.  

Xeberler.az "Bloomberg"ə istinadən məlumat verir ki, "Metal yaxa" mövzusu ilə keçirilən zirvədə 500-ə yaxın CEO və baş direktor iştirak edib, 40 fərqli sektordan 50 spiker çıxış edib. Zirvə nəticəsində hazırlanmış hesabatda süni intellektin əsasən məhsul inkişafı və risklərin idarə olunması sahələrində istifadəsi ön plana çıxıb. Zirvədə "metal yaxa dövrü", "CEO-ların çevrilməsi"(şirkət rəhbərlərinin süni intellekt dövrünə uyğunlaşmaq üçün bacarıq və idarəetmə yanaşmalarında dəyişikliklər etməsi) və "süni intellektin etik istifadəsi" kimi mövzular müzakirə edilib.  

Süni intellektin təsir edəcəyi əsas sahələr arasında səhiyyə, maliyyə, bankçılıq, ödəniş sistemləri, sənaye, istehsal, pərakəndə satış, e-ticarət, nəqliyyat və logistika, təhsil, kənd təsərrüfatı və əyləncə sektorları qeyd olunur. Qlobal süni zəka bazarının illik orta 40%-lik artım sürəti ilə 2030-cu ildə 1,81 trilyon dollara çatacağı gözlənilir.  

Bildirilib ki, qlobal süni intellekt bazarının 2024-cü ilin sonunda 136,6 milyard dollara, 2025-ci ildə 500 milyard dollara, 2030-cu ildə isə 1,81 trilyon dollara çatacağı proqnozlaşdırılır. Bundan əlavə, süni intellektin qlobal iqtisadiyyata 15,7 trilyon dollar töhfə verəcəyi gözlənilir. Bu məbləğin 6,6 trilyon dollarının işçi qüvvəsinin məhsuldarlığından, 9,1 trilyon dollarının isə istehlakçı tələbatının artımından qaynaqlanacağı qeyd edilib.