İNNOVASİYA VƏ STARTAP

Azərbaycan Texniki Universiteti İnkubasiya Mərkəzində tələbələr üçün “AzTU İT Community Meet Up #1” adlı görüş təşkil olunacaq.

Xeberler.az məlumat verir ki, iyunun 18-də saat 17:00-da keçiriləcək tədbirin məqsədi universitetdə informasiya texnologiyalarına maraq göstərən və bu sahədə aktiv fəaliyyət göstərən tələbələri bir araya gətirmək, onları İnkubasiya Mərkəzinin imkanları ilə tanış etmək və gələcək layihələr, hakatonlar, təlimlər və startap təşəbbüsləri üçün davamlı İT icması formalaşdırmaqdır.

Görüş proqramlaşdırma, süni intellekt, kibertəhlükəsizlik, data analitika, veb və mobil tətbiqlərin hazırlanması, UI/UX dizayn, robototexnika və digər texnologiya istiqamətlərinə marağı olan tələbələr üçün nəzərdə tutulub.

Tədbir çərçivəsində iştirakçılara AzTU İnkubasiya Mərkəzinin fəaliyyəti, tələbələr üçün yaradılan imkanlar, həyata keçiriləcək layihələr, hakatonlar, təlim proqramları və startap təşəbbüsləri barədə ətraflı məlumat veriləcək.

Bununla yanaşı, İT sahəsində komanda qurmaq, yeni ideyalar formalaşdırmaq və universitet daxilində texnologiya yönümlü icmanın inkişafına töhfə vermək istəyən tələbələrlə müzakirələr aparılacaq.

Təşkilatçılar bildirirlər ki, görüş universitetdə fəaliyyət göstərən texnologiya həvəskarlarının şəbəkələşməsi, təcrübə mübadiləsi aparması və yeni əməkdaşlıq imkanları yaratması üçün platforma rolunu oynayacaq.

Tədbirin detalları:

• Tarix: 18 iyun 2026
• Saat: 17:00
• Məkan: AzTU İnkubasiya Mərkəzi

Qeydiyyat üçün: Qeydiyyat forması

İT sahəsində çalışan, könüllü fəaliyyət göstərən və texnoloji layihələrdə aktiv iştirak etmək istəyən bütün tələbələr görüşə dəvət olunur.