EDUTECH

Azərbaycan Texniki Universiteti (AzTU) və “Dithari Technologies” şirkətinin əməkdaşlığı çərçivəsində universitetdə DISC (Digital Innovation, Sustainability & Circularity) İnnovasiya və dayanıqlılıq laboratoriyası fəaliyyətə başlayıb.

Xeberler.az məlumat verir ki, məqsəd rəqəmsal innovasiya, dairəvi iqtisadiyyat və dayanıqlı informasiya texnologiyaları sahələrini inkişaf etdirmək, həmçinin tələbələr, müəllim heyəti və geniş ictimaiyyət üçün bu istiqamətlərdə əlçatan və açıq praktiki mühit formalaşdırmaqdır. Yeni laboratoriya elektron tullantıların azaldılması, informasiya texnologiyaları avadanlığının bərpası və təkrar istifadəsi, yaşıl texnologiyalar və dayanıqlı istehsal modelləri üzrə tədris və tədqiqat imkanı yaradır. DISC laboratoriyası AzTU tələbələri və əməkdaşları ilə yanaşı, bu istiqamətdə fəaliyyət göstərən mütəxəssislərin və sözügedən sahəyə marağı olan şəxslərin də istifadə edə biləcəyi açıq platforma rolunu oynayacaq.

O, əlavə edib ki, laboratoriyanın istifadəyə verilməsi universitetdə dayanıqlı inkişaf və rəqəmsal transformasiya strategiyasını gücləndirir, tələbələrin praktiki bacarıqlarını artırır və sənaye ilə akademiyanın əməkdaşlığını genişləndirir. Bu təşəbbüs ölkədə ekoloji məsuliyyətli innovasiyaların inkişafına töhfə verəcək.

Laboratoriyada elektron tullantıların təkrar emalı və avadanlığın bərpası üzrə praktiki təlimlər, dairəvi informasiya texnologiyaları və dayanıqlı texnologiyalar üzrə tədris və tədqiqat layihələri, tələbə və startap komandaları üçün innovasiya və inkubasiya dəstəyi, sənaye tərəfdaşları ilə birgə pilot layihələr və seminarlar, sahə üzrə mütəxəssislər və ictimaiyyət üçün tematik görüş və təlimlər həyata keçiriləcək.