TEXNOLOGİYA

Yeni beynəlxalq araşdırma göstərir ki, körpələr tövsiyə olunan ekran vaxtı limitlərini aşır və bu, onların dil inkişafına mənfi təsir edə bilər. Tədqiqat 20 ölkədən olan alimlərin iştirakı ilə aparılıb və 19 Latın Amerikası ölkəsində 1878 körpənin məlumatları təhlil edilib.

Xeberler.az “MedicalXpress” portalına istinadən məlumat verir ki, tədqiqat nəticələrinə əsasən, körpələr arasında ən çox istifadə edilən cihazlar televizor və smartfonlardır. Orta gündəlik ekran müddəti bir saatdan çoxdur və əyləncə məqsədli məzmun izlənilir. Ekran istifadəsinin sosial-iqtisadi statusa və ölkəyə görə dəyişkənlik göstərdiyi, imkansız ailələrdə kitab istifadəsinin daha az olduğu müəyyənləşib. Əldə edilən nəticələrə əsasən, ekran vaxtı ilə dil inkişafı arasında mənfi əlaqə üzə çıxıb. Ümumi TV baxışına məruz qalma daha aşağı leksik inkişaf və dil nailiyyətləri ilə əlaqələndirilir.

Bunun əksinə, kitaba maraq daha yaxşı dil bacarıqları formalaşdırıb. Mütəxəssislər erkən yaşda həddindən artıq ekran istifadəsinin dil inkişafına mənfi təsir etdiyini vurğulayırlar. Pediatriya assosiasiyaları iki yaşdan kiçik uşaqlar üçün ekran istifadəsini məsləhət görmür, daha böyük yaş qrupları üçün isə məhdud və nəzarət altında istifadəni tövsiyə edirlər. COVID-19 pandemiyasından sonra uşaqlarda ekran istifadəsinin artması fonunda bu mövzuda narahatlıqlar da çoxalıb.