TƏDBİRLƏR

Türkiyə Cümhuriyyətinin yaranmasının 100-cü ildönümündə “TEKNOFEST” keçiriləcək.

Xeberler.az məlumat verir ki, təkcə Türkiyənin deyil, dünyanın ən böyük kosmos, aviasiya, elm və texnologiya festivalı olan “TEKNOFEST” 30 avqust - 3 sentyabrda Ankarada təşkil ediləcək.

TEKNOFEST səyahətinə İstanbuldan sonra Ankara və İzmirlə davam edəcək. Cümhuriyyətin 100-cü ildönümündə Türkiyənin 3 böyük şəhərində keçirilməsi planlaşdırılan festivalın ikinci dayanacağı paytaxt Ankara olacaq. Festival 27 sentyabr-1 oktyabrda isə İzmirdə keçiriləcək.

Milyonlarla insanı bir araya gətirən “TEKNOFEST” şövq və həyəcanı bir daha Ankara və İzmir səmalarına daşıyacaq. Hər iki şəhərdə texnologiya yarışmaları, təşəbbüs proqramları, hava şouları, mükafatlandırma mərasimləri, elmi şoular, maarifləndirici seminarlar, sərgilər, səhnə oyunları, uşaqlar üçün xüsusi uçuş təcrübələri ziyarətçilərə macəra yaşadacaq.

Festival Ankaranın Etimesgut hava limanında və İzmirin Çiğli hava limanında keçiriləcək.

Qeyd edək ki, Azərbaycan Prezidenti İlham Əliyev və birinci xanım Mehriban Əliyevanın bu il aprelin 29-da İstanbulda keçirilən “TEKNOFEST” aerokosmik və texnologiya festivalında iştirak edib.

2018-ci ildə təşkil olunmağa başladığı gündən etibarən “TEKNOFEST” hər il iştirakçı sayına görə rekord qırıb. Ölkənin milli texnologiya ekosistemində mühüm rol oynayan nazirliklər, sədrliklər, dövlət və özəl sektor təşkilatları, akademik qurumlar və media şirkətləri daxil olmaqla, 117 qurumun iştirakı ilə keçirilən “TEKNOFEST 2023” İstanbulda bu il 130 iştirakçı və 19 sponsor şirkət iştirak edib.

Festival çərçivəsində milli texnologiya istehsalı və inkişafı sahələrində çalışan minlərlə gəncin layihələrini dəstəkləmək üçün təşkil edilən texnologiya yarışmaları 41 əsas yarışma və 102 fərqli kateqoriyada keçirilib. “TEKNOFEST Türkiyə–2023” çərçivəsində yarışmaların final mərhələsinə 100-dən çox tələbənin iştirak etdiyi 16 Azərbaycan komandası vəsiqə qazanıb. Gənclərə 13 milyon lirədən çox mükafat, 30 milyon lirədən çox maddi dəstək verilib. Yarışlarda yer alan gənclər “TEKNOFEST” səhnəsində mükafatlarını alıblar.

Xatırladaq ki, mütəmadi olaraq İstanbulda keçirilən “TEKNOFEST” 26-29 may 2022-ci il tarixlərində ilk dəfə Türkiyədən kənarda – Azərbaycanda keçirilərək bir ilkə imza atıb.

Ötən aprel və may aylarında İstanbulda keçirilən texnologiya festivalına 2,5 milyondan çox insan qatılıb.