TEXNOLOGİYA

Qlobal, məşhur texnologiya şirkətlərində işə qəbul ilə bağlı araşdırmalarımız davam edir.

İndiyə qədər  IBM, Apple, T-Mobile, Samsung Electronics kimi şirkətlər barədə yazı yayımlamışıq.

Bu dəfə şəhər üzrə avtomobil sifarişi üçün eyniadlı mobil tətbiq hazırlayan Uber beynəlxalq texnologiya şirkətində işə qəbul ilə bağlı ətraflı məlumat təqdim etməyə çalışacağıq.

Şirkət məsələ ilə bağlı sorğumuzu cavablandırıb.

Qeyd edilib ki, Uber partnyor-sürücülər şirkətin əməkdaşları sayılmır. Belə ki, Uber Bakıda yalnız fərdi sahibkarlarla çalışır:

“Əməkdaşlıqdan öncə biz potensial partnyorlarımızı (fərdi sahibkarları) yoxlayırıq. Sistemə qoşulmaq üçün partnyor-sürücü sənədlər toplusunu təqdim etməlidir ki, bura sürücülük vəsiqəsi, avtomobilə olan sənədlər, sığorta və s. daxildir. Bundan başqa, sürücüyə və onun avtomobilinə də bir neçə tələbimiz mövcuddur ki, bunlara tam şəkildə riayət olunur".

Məlumata görə, Uber-də bir sıra qayda mövcuddur ki, partnyorlar bu barədə platformaya qoşulmamışdan öncə məlumatlandırılır:

“Sözügedən qaydalara riayət etmək rahat və təhlükəsiz gedişləri həyata keçirməyə imkan verir, bu da həm Uber-in, həm də partnyorların əsas məqsədidir. Sürücülər yol hərəkəti qaydalarına əməl etməli, avtomobili təmiz saxlamalı, ona vaxtında texniki xidmət göstərməlidirlər".

Uber-də işləmək üçün müraciət formasına gəldikdə isə şirkət bildirib ki, Siz uber.com saytında qeydiyyatdan keçib və ya sürücülərin qoşulması üzrə mərkəzə yaxınlaşa bilərsiniz.

Uber işə qəbul zamanı ölkələrə fərq qoyur. Şirkətin məlumatında deyilir ki, hər ölkə üçün özəl tələblər və özəl sənədlər siyahısı mövcuddur, buna görə şərtləri sürücülərin qoşulması üzrə mərkəzdə dəqiqləşdirmək gərəkdir.

Öyrənirik ki, Uber-lə əməkdaşlıq edərək partnyor-sürücü iş yükünü özü müəyyənləşdirə bilər. Belə ki, burada bütün gün ərzində və ya da axşamlar və istirahət günlərində, müntəzəm və ya vaxtaşırı işləmək nəzərdə tutulur.

Uber – şəxsi sürücü ilə avtomobillərin sifarışı üzrə mobil xidmətlərin hazırlanması ilə məşğul olan beynəlxalq texnologiya şirkətidir. Şirkət dünyanın 77 ölkəsinin 600 şəhərində xidmətlərini göstərir. Uber missiyası - şəhər ətrafında, hərəkəti, su təchizatı kimi sadə, etibarlı və bütün sakinlər üçün əlçatan etməkdir. 8 ildir fəaliyyətdə olan şirkət bütün dünyada 5 milyardan çox gediş təmin edib.

Onu da əlavə edək ki, bu yaxınlarda Uber-ə yeni icraçı direktor təyin edilib.

Məltəm Talıbzadə