EDUTECH

Sənaye və İnnovasiyalar üzrə Bakı Dövlət Peşə Təhsil Mərkəzi 2017-2018-ci tədris ilindən dövlət-biznes partnyorluğu çərçivəsində STEP İT Academy ilə birgə Veb-dizayner ixtisası üzrə kadr hazırlığına başlayır.

Təhsil Nazirliyindən Xeberler.az-a verilən məlumata görə, məzunlar təhsil müddəti bir il olan Veb dizayner ixtisası üzrə pulsuz təhsil alaraq yerli və beynəlxalq əmək bazarının tələblərinə cavab verən mütəxəssis kimi yetişmək imkanı qazanacaqlar. 

Təhsillərini müvəffəqiyyətlə başa vurmuş məzunlara dövlət nümunəli peşə diplomu ilə yanaşı beynəlxalq səviyyədə tanınan sertifikat da veriləcək. Seçimlərdə tam orta təhsilli şəxslər iştirak edə bilər. Seçimlərdə dövlət hesabına ilk peşə-ixtisas təhsili almış şəxslər iştirak edə bilməzlər.

Ərizələrin qəbulu ASAN xidmət mərkəzlərində aparılacaq. ASAN peşə layihəsi çərçivəsində ilk peşə-ixtisas təhsili müəssisələrinə də sənəd qəbulu davam edir. Ərizə qəbulu üçün şəxsiyyət vəsiqəsi və təhsil haqqında sənəd (şəhadətnamə və ya attestat) tələb olunur.

İlk peşə-ixtisas təhsili müəssisələrinə sənəd vermiş şəxslər 10 ixtisas seçmək hüququna malikdir. Şagird qəbulu şəhadətnamə və attestat üzrə müvafiq fənlərin orta balı nəzərə alınmaqla həyata keçirilir.

Ərizələrin qəbulu avqustun 22-dək ASAN xidmət mərkəzlərinin və müvafiq təhsil müəssisələrinin sənəd qəbulu komissiyalarında ödənişsiz formada aparılır.

Ötən tədris ilindən başlayaraq Təhsil Nazirliyi və ASAN xidmət-in birgə həyata keçirdiyi ASAN peşə layihəsinin əsas məqsədi dövlət ilk peşə-ixtisas təhsili müəssisələrinə qəbulun rahatlığını və obyektivliyini təmin etməkdir.

Məltəm Talıbzadə