TEXNOLOGİYA

ABŞ Federal Aviasiya İdarəsi böyük yüksəklikdə uçuşlara nəzarət edən 20 regional dispetçer mərkəzini mülki təyyarələrdə yanacağa qənaət etməyə, eləcə də reyslərin ləngimə vaxtını azaltmağa imkan verəcək yeni iş sisteminə keçirib.

Xəbərlər RYTN-nin rəsmi saytına istinadən məlumat verir ki, "USA today" qəzetinin məlumatına görə, modernləşdirmənin dəyəri 2,5 milyard dollar təşkil edib. Sistem təyyarələri dəqiqliklə izləməyə imkan verərək havada onların bir-birinə daha çox yaxınlaşmasına şərait yaradacaq. Beləliklə, dispetçerlərin bir təyyarəni digərindən ayırması üçün marşrutları dəyişməsinə ehtiyac qalmayacaq. Bunun sayəsində ABŞ hava məkanında fəaliyyət göstərən aviaşirkətlərin yanacaq xərclərinə ildə 6 milyon dollara qənaət edəcəyi gözlənilir.

İndiyədək dispetçerlər hava gəmiləri haqqında məlumatları yalnız yerüstü radarlardan alırdılarsa, hazırda onlara bu işdə kosmik peyklər yardımçı olacaq. Bu, həmçinin Meksika körfəzi və ya Alyaskanın bir neçə sahəsi kimi nəzarətdən kənar qalan zonaları əhatə dairəsinə daxil etməyə imkan verəcək. “Təyyarələrin hərəkət istiqaməti barədə dəqiq məlumat verən və təyyarənin qalxmasından enməsinədək uçuşları daha effektiv idarə edən peyk texnologiyasından istifadə olunacaq”, - ABŞ nəqliyyat naziri Entoni Foks bildirib.

Bu vaxtadək dispetçerlər 1960-cı illərdə hazırlanan “Host” sistemindən istifadə ediblər. Sistem eyni anda 1,1 min reysə nəzarət etməyə imkan verib, hazırda isə bu say 1,9 minədək artacaq. 

Xeberler.az