TEXNOLOGİYA

Əldə etdiyimiz məlumata görə, Nəqliyyat, Rabitə və Yüksək Texnologiyalar Nazirliyinin tərkibindəki Yüksək Texnologiyalar Parkı başqa bir yerə köçməyə hazırlaşır.

Qeyd edək ki, YTP hazırda AF Business House-un 3-cü mərtəbəsində yerləşir.

Xeberler.az-ın əldə etdiyi məlumata görə, YTP yerləşdiyi məkanın aylıq və digər bu kimi maliyyə xərclərini ödəyə bilmədiyi üçün başqa bir məkana köçməyi planlaşdırır.

Belə ki, yaşanan iqtisadi sıxıntılara görə, YTP daha uyğun qiymətli məkana köçəcək.

Məsələni YTP ilə dəqiq etməyə çalışdıq.

Qurumdan Xeberler.az-a məlumatı təsdiqləyiblər. Qeyd edilib ki, məsələ gündəmdədir. Amma YTP-ın hara köçəcəyi hələlik məlum deyil. Məlumata görə, bunu Nəqliyyat, Rabitə və Yüksək Texnologiyalar Nazirliyi müəyyən edəcək.

Ümumiyyətlə, son zamanlarda bu qurumun hətta ləğv ediləcəyi ilə bağlı iddialar da gündəmdə yer alıb. Belə ki, bəzi ekspertlər qurumun uzun müddət fəaliyyət göstərməsinə baxmayaraq qarşıya qoyulan vəzifələrin böyük əksəriyyətinin həyata keçirə bilmədiyi qənaətindədir.

Ekspertlərin sözlərinə görə, innovativ istehsala yönəlik klassik, çoxsaylı fəaliyyəti qarşıya məqsəd qoyan texnoparklar əslində innovasiyaların hərəkətverici qüvvəsi olaraq əhəmiyyətini itirib.

Pirallahıda yaradılması nəzərdə tutulan YTP-ın tikintisinin müəyyən səbəblərdən uzun illər ləngiməsi də bu sahədəki iddiaları daha da artırıb.

Məsələni gündəmdə saxlayırıq.

Xeberler.az