İNTERNET

Regionun ən böyük beynəlxalq magistral operatoru “AzerTelecom” internet mübadiləsi (IX) mərkəzlərinin yaradılması üzrə dünyanın aparıcı şirkəti olan “DE-CIX” ilə strateji tərəfdaşlığa başlayır. Tərəfdaşlıq çərçivəsində Azərbaycanda yerli və beynəlxalq internet operatorları arasında birbaşa və sürətli trafik mübadiləsini təmin edəcək “AZE-IX” (Azerbaijan Internet Exchange) internet mübadiləsi mərkəzi istifadəyə verilir.

“AZE-IX” yerli və beynəlxalq şəbəkələr, məzmun təminatçıları, bulud xidmətləri operatorları və müəssisələr üçün neytral platforma rolunu oynayacaq. Bu platforma trafik mübadiləsinin Azərbaycanda həyata keçirilməsini təmin edərək gecikmələrin azalmasına və magistral internet şəbəkələrinin performansının gücləndirilməsinə imkan verəcək.

Mərkəzin istifadəyə verilməsi “Rəqəmsal İpək Yolu” layihəsinin həyata keçirilməsində mühüm mərhələ olmaqla, Avropa, Asiya və Yaxın Şərq arasında məlumat mübadiləsi və rəqəmsal bağlantının əsas mərkəzlərindən biri kimi Azərbaycanın mövqeyini daha da gücləndirəcək.

“AzerTelecom” şirkətinin Direktorlar Şurasının sədri Emil Məsimov “DE-CIX” ilə tərəfdaşlığın əhəmiyyətini vurğulayaraq qeyd edib: “AZE-IX regional və qlobal şəbəkələr üçün əsas internet bağlantı qovşaqlarından birinə çevirilərək Azərbaycanı dünya internet mübadiləsi mərkəzləri xəritəsinə daxil edəcək”.

“Artıq 30 ildən çoxdur ki, “DE-CIX” regionlara rəqəmsal və texnoloji xidmətlərə çıxış imkanı istiqamətində mövcud olan boşluqları aradan qaldırmağa kömək edən neytral arabağlantı ekosistemləri formalaşdırır. Azərbaycanın Xəzər dənizi, Qara dəniz və Mərkəzi Asiya dəhlizlərinin kəsişməsində yerləşməsi onu yeni regional rəqəmsal bağlantı qovşağı üçün ideal məkana çevirir. Biz özünü doğrultmuş qarşılıqlı bağlantı modelimizi Azərbaycana gətirmək və ölkənin bağlantı ekosisteminin inkişafını dəstəkləmək üçün “AzerTelecom” ilə əməkdaşlıq etməkdən məmnunuq”, - deyə “DE-CIX” şirkətinin baş icraçı direktoru İvo İvanov bildirib.

“AZE-IX” internet mübadiləsi mərkəzi “DE-CIX”in Avropa, Yaxın Şərq, Afrika, Asiya və Amerikada 50-dən çox internet mübadiləsi platformasının fəaliyyətini təmin edən, beynəlxalq səviyyədə özünü doğrultmuş arabağlantı modeli əsasında qurulacaq.

“AzerTelecom” haqqında

“AzerTelecom” regionun ən böyük beynəlxalq magistral operatoru olmaqla internet trafikinin topdansatışı, tranziti, transmissiya və s. əlaqəli xidmətləri təqdim edir. “AzerTelecom” Avropa ilə Asiya arasında yeni rəqəmsal dəhlizin yaradılmasını nəzərdə tutan transkontinental “Rəqəmsal İpək Yolu” (Digital Silk Way) layihəsini həyata keçirir. “AzerTelecom” müxtəlif ölkələrdə və sahələrdə fəaliyyət göstərən “NEQSOL Holding” beynəlxalq şirkətlər qrupunun tərkibində olan “Azerconnect Group”a daxildir.

“DE-CIX” haqqında

“DE-CIX” yüksəksəviyyəli qarşılıqlı bağlantı xidmətləri təqdim edir və Avropa, Yaxın Şərq, Amerika, Asiya və Afrikada operator və data mərkəzlərindən müstəqil fəaliyyət göstərən bir sıra internet mübadilə mərkəzlərini idarə edir. Şirkət müştərilərinin qarşılıqlı bağlantı ehtiyaclarını qarşılamaq üçün yüksək texniki keyfiyyət və qabaqcıl dəstək xidmətləri təqdim edir. “DE-CIX” qarşılıqlı bağlantı xidmətlərini davamlı olaraq təkmilləşdirir və bu sahədəki ekspert təcrübəsi ilə müştərilərini dəstəkləyir.