PROQRAMLAR

Oktyabrın 24-də beynəlxalq ictimaiyyət Ümumdünya İnkişaf İnformasiyası Gününü qeyd edir.

Xeberler.az bildirir ki, BMT Baş Assambleyası tərəfindən 1972-ci il dekabrın 19-da təsis edilən bu əlamətdar günün qeyd edilməsinin məqsədi ictimaiyyətin diqqətini inkişaf məsələlərinə cəlb etmək və mövcud problemlərin həlli üçün ölkələr arasında əlaqələri gücləndirməkdir.

Ümumdünya İnkişaf İnformasiyası Gününün 2025-ci ildə mövzusu məlumatların yayılmasının təşviqi və dünya üçün inkişaf problemlərinin həllinə dəstək olmaq məqsədilə ictimai rəyin müəyyən edilməsidir. Mövzu, həmçinin daha yaxşı bir dünya üçün Birləşmiş Millətlər Təşkilatının Davamlı İnkişaf Məqsədlərinə (DİM) çatmaq üçün birgə səyləri təşviq edir. Əlamətdar gün çərçivəsində konfranslar, seminarlar və təlim proqramları təşkil edilir. 

BMT Ümumdünya İnkişaf İnformasiyası Gününün əhəmiyyətini aşağıdakı sahələr üzrə qeyd edib: “Bu əlamətdar gün yoxsulluq, bərabərsizlik, təhsil və səhiyyəyə qeyri-kafi çıxış kimi vacib inkişaf problemləri barədə dünya ictimaiyyətinin məlumatlılığını artırır, problemlərin həllində beynəlxalq əməkdaşlıq və həmrəyliyin rolunu qeyd edir. Eyni zamanda, davamlı inkişafa kömək etmək üçün məlumatların yayılmasını və ictimai rəyi təqdim edir, rəqəmsal uçurumu azaltmaq, inkişafı stimullaşdırmaq üçün informasiya-kommunikasiya texnologiyalarının tətbiqinin zəruriliyini vurğulayır. Qloballaşma kontekstində ticarət və inkişaf məsələlərinə yeni həllər tapmaqda ən müasir informasiya və kommunikasiya texnologiyalarının tətbiqi hazırkı şəraitdə ən aktual məsələlərdən biridir”.

Müraciətdə süni intellekt texnologiyalarının sürətli inkişafı, onun gələcək sosial-iqtisadi fəsadlarının aradan qaldırılması ilə bağlı təşkilata üzv dövlətlərin qarşılıqlı fəaliyyətinin əhəmiyyəti də vurğulanır.