MÜSAHİBƏ

Ailə TV kabel televiziyası operatoru, ölkədə informasiya və kommunikasiya texnologiyaları (İKT) sahəsində fəaliyyət  göstərən “Caspian Telecom” MMC şirkətinin brendidir.  “Caspian Telecom” MMC eyni zamanda provayder şirkəti olaraq, korporativ şəbəkə operatoru və sistem inteqratoru kimi fəaliyyət göstərir.

Xəbərlər  Ailə TV və Ailə NET-in  fəaliyyətləri və gələcək istiqamətləri ilə maraqlanıb.

Caspian Telecom şirkətinin mətbuat katibi Sabir Məşədizadə  bu istiqamətdə Xəbərlər-in suallarını cavablandırıb.

 -Ailə TV və Ailə NET şəbəkəsinin genişləndirilməsi üzrə işlər nə yerdədir?

- Ölkəmizdə İKT sahəsinin inkişafının əsas prioritet istiqamətlərindən biri tam olaraq rəqəmsal yayıma keçid və bütün ölkə üzrə geniş zolaqlı fiber-optik internet şəbəkəsinin qurulmasıdır. Bu strategiyaya arxalanaraq, Caspian Telecom şirkəti 2010-cu ildən Ailə TV brendi altında rəqəmsal kabel televiziyası, 2011-ci ildən isə Ailə NET brendi altında internet provayder xidmətləri göstərir. Görülən işlər nəticəsində, Ailə TV/NET şəbəkəsinə Bakı şəhərinin, Xətai, Nizami, Nərimanov, Binəqədi, Nəsimi, Səbail, Suraxanı  rayonu, o cümlədən Bakıxanov və Hövsan qəsəbəsi, Gəncə şəhəri, eləcə də Yeni Gəncə qəsəbəsi artıq tam olaraq daxil edilib.

 -Rəqəmsal yayımın stimullaşdırılması üzrə Ailə TV hansı təşəbbüslər göstərir?

 -CaspianTelecom şirkəti öz xidmətlərinin abunəçilərə daha mükəmməl olması məqsədi ilə səylə çalışır və mütəmadi olaraq müxtəlif güzəştli kampaniyalar keçirir. Hazırda Ailə TV-nin təqdim etdiyi “Resiver və 4 ay müddətinə 100 TV kanal = 60 AZN” aksiyası ölkəmizdə rəqəmsal yayıma keçidi stimullaşdıran ən optimal kampaniyadır. Bu istiqamətdə Gəncə şəhərində də bir çox əlavə stimullaşdırıcı işlər görülməkdədir.

 -Ailə TV abunəçilərinə  kabel televiziyası xidməti ilə yanaşı hansı yeni  xidmətləri təqdim etməyi nəzərdə tuturmu?

 - Qeyd etdiyimiz kimi, Caspian Telecom şirkəti  hazırda Ailə TV brendi altında kabel televiziyası, Ailə NET brendi altında isə internet provayder xidmətləri göstərir. Yaxın günlərdə şirkət təqdim olunan xidmət növlərinin də sayının artırılmasını və ən son, qabaqcıl texnologiyaların tətbiqini planlaşdırır, bu da göstərilən xidmət səviyyəsinin yüksəldilməsi ilə yanaşı şirkətin inkişafının prioritet istiqaməti hesab olunur.

Caspian Telecom şirkəti yaxın vaxtlarda abunəçilərə ən müasir tələblərə cavab verən OTT/İP TV xidmətinin tətbiqini planlaşdırır. Over The Top texnologiyası üzərindən abunəçilərə təqdim olunacaq yeni Ailə TV xidmətini dünyanın istənilən yerində izləmək mümkün olacaq ki, bu da ilk növbədə əhatə dairəsi baryerini tam olaraq üstələyəcək. Digər tərəfədən yeni Ailə OTT/İP TV xidməti ölkəmizin ixrac potensialının güclənməsində də öz töhfəsini verəcək.

Məltəm Talıbzadə