RƏQƏMSAL DÜNYA

AMEA Yüksək Texnologiyalar Parkı (YTP) və Nevşehir Hacı Bektaş Veli Universitetinin nəzdində fəaliyyət göstərən Kapadokiya Texnoparkı arasında əməkdaşlıq protokolu imzalanıb.

Xeberler.az bildirir ki, AMEA YTP-nin baş direktoru, iqtisad üzrə fəlsəfə doktoru Vasif Abbasov və Kapadokiya Texnoparkının baş direktoru Bilgin Yazlık tərəfindən imzalanan sənədin əsas məqsədi iki qurum arasında davamlı əməkdaşlığın qurulması, çoxtərəfli layihələrin həyata keçirilməsi ilə qardaş ölkələr olan Azərbaycan və Türkiyənin texnoloji inkişafına mühüm töhfələr verməkdir.

Protokol çərçivəsində Kapadokiya Texnoparkı AMEA YTP-nin İnkubasiya və Texnologiyaların Transferi Mərkəzinin fəaliyyətinin gücləndirilməsində, birgə inkubasiya proqramlarının hazırlanmasında, Türkiyədə texnoparkların inkişafı üçün dəstək proqramlarında, eləcə də Avropa İttifaqı və digər beynəlxalq təşkilatların layihə çağırışlarının reallaşdırılmasında iştirakının təmin edilməsində YTP-yə dəstək göstərəcək. Bundan əlavə, tərəflər innovasiya ekosisteminin inkişafına töhfə verə biləcək birgə konfrans və seminarların təşkili, kadr hazırlığı üçün qısamüddətli təlim və mentorluq dəstəyinin təmin edilməsi, akademiya-sənaye əməkdaşlığının inkişafı üçün qarşılıqlı təcrübə mübadiləsi, Azərbaycanda yetişən sahibkarların Kapadokiya Texnoparkına yönləndirilməsi və Kapadokiya Texnoparkının Azərbaycan ekosistemi ilə tanış edilməsini təmin edəcəklər.

Bu günlərdə YTP-nin İnkubasiya və Texnologiyaların Transferi Mərkəzinin şöbə müdiri Bünyamin Seyidov və AMEA Radiasiya Problemləri İnstitutunun aparıcı mühəndisi Namiq Heydərov Türkiyə texnoparklarının təcrübəsinin öyrənilməsi, ikitərəfli və çoxtərəfli əməkdaşlıq, o cümlədən birgə proqram və layihələrin icrası imkanlarının müzakirə edilməsi məqsədilə Ankara Bilkent Universitetinin “Cyberpark”ı, Orta Şərq Texniki Universitetinin Texnoparkı (Orta Doğu Teknik Üniversitesi (ODTÜ) Teknokenti), Türk Aerokosmik Sənaye Şirkəti (Türk Havacılık ve Uzay Sanayii A.Ş. – TUSAŞ), Türkiyə Respublikası Prezidenti Administrasiyasının Rəqəmsal Transformasiya Ofisi (Türkiye Cumhuriyeti Cumhurbaşkanlığı Dijital Dönüşüm Ofisi) və Nevşehir Hacı Bektaş Veli Universitetində keçirilən görüşlərdə iştirak ediblər.

“Bilkent Cyberpark”ın baş direktoru Faruk İnaltekin, ODTÜ Teknokentin Biznesin inkişafı və marketinq departamentinin direktoru Selin Doğu, TUSAŞ-ın Akademiya başkanı professor Ahmet Pınarbaşı, Türkiyə Respublikası Prezidenti Administrasiyasının Rəqəmsal Transformasiya Ofisinin departament rəhbəri Halil İbrahim Özer və Nevşehir Hacı Bektaş Veli Universitetinin rektoru, professor Semih Aktekin ilə keçirilən görüşlərdə AMEA YTP-nin texnologiyaların transferi və inkubasiya sahələrində inkişafına dəstək verən proqramların təşkili, texnopark quruculuğu istiqamətində digər fəaliyyətlər, Bakıda TUSAŞ-ın mühəndislik ofisinin yaradılması, eləcə də azərbaycanlı tədqiqatçı və mühəndislərin Ankarada ixtisasartırma proqramlarına cəlb edilməsi, “Digital Europe”, “Horizon Europe” layihələri üzrə birgə əməkdaşlıq, kompüter mühəndisliyi sahəsində “Erasmus+” proqramı üzrə azərbaycanlı tələbələrin Nevşehir Universitetində təhsilini təkmilləşdirmələri ilə bağlı məsələlər müzakirə edilib.

Səfər çərçivəsində 20-21 iyul tarixlərində Kapadokiya Texnoparkında AMEA nümayəndələri üçün iki günlük təlim keçirilib, texnoparkların fəaliyyət mexanizmi, texnoloji transfer və kommersiyalaşdırılma prosesləri, biznes inkubasiya, əqli mülkiyyət, akademiya-sənaye əməkdaşlığına dair geniş təqdimatlar təqdim edilib.