KOSMOS

Fransanın inzibati idarəçiliyində olan Fransız Qvianasındakı Kuru kosmodromundan start götürən Ariane-5 ağır raketdaşıyıcısı uğurla iki telekommunikasiya peykini orbitə çıxarıb.

Xeberler.az xarici mətbuata istinadən məlumat verir ki, bu barədə Arianespace şirkətinin rəhbəri Stefan İsrael bildirib.

Bildirilir ki, hazırda geostasionar orbitdə iki yeni peyk var. Bunlardan biri Airbus Defence and Space və Thales Alenia Space korporasiyalarının ARABSAT peyk rabitəsi operatoru ilə imzalanan saziş üzrə yaradılan ARABSAT-6B (BADR-7) aparatıdır. ARABSAT peyklərinin altıncı nəsli olan və istismar müddəti 15 il təşkil edən aparat Yaxın Şərq, Afrika və Mərkəzi Asiya regionlarının teleradio yayımı, sürətli internet və telefon rabitəsi ilə təmini üçün nəzərdə tutulub.

İkinci peyk - Hindistan Kosmik Agentliyinə (ISRO) məxsus GSAT-15 peyki Hindistan subqitəsində həm naviqasiya xidmətləri, həm də qəza-xilasetmə və təcili tibbi xidmət işləri üçün telekommunikasiya dəstəyi üçün nəzərdə tutulub. Həmçinin peykdən Hindistan ərazisində birbaşa peyk televiziya yayımı üçün istifadəsi planlaşdırılır.

Kuru kosmodromundan buraxılan raket sayca onuncu uğurlu raket buraxılşı olub. Əsas rəqiblərinin SpaceX və Roskosmos şirkətlərinin olduğu Arianespace dünyanın süni Yerətrafı peyklərin kommersiya buraxılışını həyata keçirən qocaman şirkətlərindədir. Şirkət 21 səhmdar və Avropa Kosmik Agentliyinin dəstəyi ilə yaradılıb.

Xeberler.az