MOBİL RABİTƏ

Bu ilin may ayında Azərbaycan sabit genişzolaqlı internetin median sürətinə görə 181 ölkə arasında 29,14 MB/S sürətlə 116-cı yerdə qərarlaşıb.

Xeberler.az “Speedtest Global Index”ə istinadən xəbər verir ki, bu aprel ayı ilə müqayisədə dəyişiklik olmamasını göstərir.

Sabit genişzolaqlı internetin sürətinə görə birinci yeri Sinqapur (241,35 MB/S), sonuncu yeri isə Kuba (1,93 MB/S) tutub.

Məlumata görə, ölkəmiz mayda mobil internetin sürətinə görə 140 ölkə arasında 40,97 MB/S sürətlə 55-ci yerdə qərarlaşıb. Bu isə aprelə nisbətən 3 pillə irəliləmə deməkdir.

Mobil internetin sürətinə görə birinci yeri Birləşmiş Ərəb Əmirlikləri (BƏƏ) (181,79 MB/S), sonuncu - 140-cı yeri isə Əfqanıstan (4,3 MB/S) tutub.

Bundan başqa, mayda Bakı şəhəri mobil internetin sürətinə görə 2 pillə irəliləyərək 43,08 MB/S sürətlə 172 şəhər arasında 72-ci yerə sahiblik edib.

Şəhərlər arasında mobil internetin sürətinə görə birinci yeri 207,35 MB/S sürətlə BƏƏ-nin Dubay şəhəri, sonuncu yeri isə 1,07 MB/S sürətlə Sudanın Xartum şəhəri tutub.

Azərbaycan paytaxtı sabit genişzolaqlı internetin sürətinə görə isə 31,27 MB/S sürətlə 137-cı pillədə qərarlaşıb ki, bu da 1 pillə geriləməkdir.

Şəhərlərin sabit genişzolaqlı internet üzrə reytinqində isə 190 şəhər rəqabət aparıb. Siyahıya Çinin paytaxtı Pekin 268,09 MB/S sürətlə liderlik edib. Kubanın paytaxtı Havana şəhəri isə 1,83 MB/S sürətlə sonuncu olub. (Report)