TƏHLÜKƏSİZLİK

Kibercinayətlərin sayının artımı səbəbindən kompüter piratçılığı və kibercinayətlərə məruz qalmış istifadəçilərin müdafiəsi məqsədilə Microsoft şirkəti  Azərbaycanda Qaynar xətt açır.

Xeberler.az-ın məlumatına görə,  şirkət Azərbaycanda kibertəhlükələrin artımını qeyd edir ki, bu da son zamanlar ölkədə korporativ kompüterlərə, veb-saytlara və şirkətlərin İT-şəbəkələrinə kiberhücumların sürətli artımı ilə bağlıdır.

IDC-nin hesabatına əsasən, 65 faiz  hallarda şirkət əməkdaşlarının fərdi kompüterlərinə lisenziyasız proqram təminatı quraşdırılır, hər dördüncü işçi isə öz kompüterinə qeyri-leqal proqram və tətbiqlər yükləyir.

İnternetdə Microsoft Korporasiyasının müxtəlif proqram məhsullarını pulsuz yükləmək təklifi vasitəsi ilə eyni saxta sxem Azərbaycanda da rast gəlinir. Misal üçün “pulsuz Windows yükləmək” təklifi vasitəsi ilə internetdən proqram yükləndiyi zaman 100 haldan 92-sində müştərilər öz məxfi məlumatlarını və pullarını itirmək riskinə məruz qalır.

Microsoft Korporasiyasının Kibercinayətkarlıq ilə Mübarizə Beynəlxalq Mərkəzinin məlumatına əsasən, Şərqi Avropa ölkələrində vətəndaşların 80 faizi  keçmişdə kibercinayətkarlıq ilə qarşılaşıb, orta və kiçik sahibkarlıqla məşğul olan şirkətlərinin 97,5 faizi isə ən azı ildə bir dəfə kibertəhlükəyə məruz qalıb.

 “Cinayətkarlar yüksək texnologiyalardan istifadə etdiyi üçün təhlükə səviyyəsi daim artır. Ötən il ərzində 317 milyon zərərli proqram yaradılıb ki, bu da gün ərzində 1 milyona yaxın yeni kibertəhlükə deməkdir, - deyə Microsoft-un MDB ölkələrində proqram aktivlərinin idarə edilməsi və lisenziyalaşma şərtlərinə əməl edilməsinin yoxlanması üzrə direktoru Dmitri Beresnyev qeyd edib.

Onun sözlərinə görə, Microsoft  Korporasiyası piratçılığa qarşı mübarizədə yalnız lisenziyalaşdırılmış proqram təminatını istifadə etməyi, müntəzəm olaraq əməkdaşlara korporativ təhlükəsizlik barədə təlim keçməyi, həmçinin məlumatların müdafiəsi məqsədilə xüsusi proqram və cihazlardan tətbiq etməyi məsləhət görür.

Təkcə 2015-ci il ərzində bütün dünya üzrə kiberhücumların zərəri 159 milyard ABŞ dollarına bərabərdir, Symantec-ın məlumatına əsasən, hesabat ilində 594 milyon insan haker hücumlarının qurbanı olub.

Kompüter piratçılığı da daxil olmaqla kibercinayətlər barədə bildirmək və ya bununla bağlı məsləhət almaq istəyənlər Azərbaycan ərazisində bu elektron adres ünvanına müraciət edə bilər.

 Məltəm Talıbzadə