Beynəlxalq Nəqliyyat Forumu (BNF) tərəfindən hazırlanan “Strateji baxışa əsaslanan nəqliyyat planlaşdırılması: siyasətçilər üçün bələdçi” adlı beynəlxalq hesabatda Azərbaycanın nəqliyyat sektorunda həyata keçirdiyi islahatlar müsbət təcrübə kimi qeyd olunub.
Xeberler.az bildirir ki, hesabatda vurğulanır ki, müasir nəqliyyat planlaşdırılması yalnız infrastruktur layihələri ilə məhdudlaşmamalı, uzunmüddətli strateji baxışa əsaslanmalıdır. Bu çərçivədə ölkələrə nəqliyyat sistemlərini daha dayanıqlı, əlçatan və effektiv etmək üçün institusional koordinasiyanın gücləndirilməsi, maliyyə mexanizmlərinin təkmilləşdirilməsi və məlumat əsaslı qərarvermənin tətbiqi tövsiyə edilir.
Sənədin “Planlaşdırma alətləri” bölməsində Azərbaycan Respublikası Prezidentinin 2023-cü il sərəncamı ilə yaradılmış Nəqliyyatı Əlaqələndirmə Şurası xüsusi qeyd olunub. Bildirilib ki, Şura müxtəlif dövlət qurumları arasında koordinasiyalı fəaliyyəti təmin edir.
Eyni zamanda hesabatın “Resursların səfərbər edilməsi və koordinasiya üzrə praktiki nümunələr” bölməsində Azərbaycanın daha bir təşəbbüsü – İctimai nəqliyyat Məqsədli Büdcə Fondu uğurlu maliyyələşdirmə modeli kimi təqdim edilib. 2025-ci ildə yaradılan bu fond ictimai nəqliyyat xidmətlərinin davamlılığını, keyfiyyətini və təhlükəsizliyini təmin etməyə yönəlib.
Qeyd olunur ki, bu yanaşmalar Azərbaycanın nəqliyyat sektorunda idarəetmənin təkmilləşdirilməsi, maliyyə dayanıqlığının gücləndirilməsi və sistemli planlaşdırma prinsiplərinin tətbiqi istiqamətində həyata keçirdiyi siyasətin beynəlxalq səviyyədə tanındığını göstərir.
Bu uğur, həmçinin ölkənin daha dayanıqlı, inteqrasiya olunmuş və gələcəyə yönələn nəqliyyat sisteminin qurulması istiqamətində atdığı addımların əhəmiyyətini bir daha təsdiqləyir.
