NƏQLİYYAT

Mayın 6-da Leypsiq şəhərində Azərbaycanın prezidentliyi ilə Beynəlxalq Nəqliyyat Forumunun (BNF) Sammiti işə başlayıb.

Xeberler.az məlumat verir ki, bu il keçirilən sammit “Dayanıqlı nəqliyyatın maliyyələşdirilməsi” mövzusuna həsr olunub. Tədbirdə iqlim dəyişiklikləri, urbanizasiya və texnoloji yeniliklər fonunda dayanıqlı nəqliyyat sistemlərinin qurulması və maliyyələşdirilməsi məsələləri müzakirə edilir.

Açılış mətbuat konfransında çıxış edən rəqəmsal inkişaf və nəqliyyat naziri Rəşad Nəbiyev bildirib ki, Azərbaycan BNF-yə sədrliyi dövründə təşkilatın daha güclü və inklüziv platformaya çevrilməsi istiqamətində fəaliyyət göstərib. Nazir forumun 20 illik yubileyi münasibətilə tərəfdaş ölkələrə və təşkilatlara təşəkkürünü ifadə edib.

Onun sözlərinə görə, Azərbaycanın sədrliyi dövründə təşkilatın institusional fəaliyyətinin səmərəliliyinin artırılmasına xüsusi diqqət yetirilib və üzv ölkələrlə əməkdaşlıq nəticəsində İş Proqramı üzrə razılıq əldə olunub.

Sammit çərçivəsində “The Price of Resilience: Why It Pays, Why It’s Hard?” adlı açılış plenar sessiyası keçirilib. Sessiyada nəqliyyat sektorunda dayanıqlılığın iqtisadi sabitlik, əlaqəlilik və uzunmüddətli risklərin azaldılmasındakı rolu müzakirə olunub.

Tədbirin açılış hissəsində Azərbaycanın zəngin mədəni irsi və müasir inkişafını əks etdirən videoçarx nümayiş olunub. Videoçarxda ölkənin tarixi, multikultural dəyərləri, müasir şəhər infrastrukturu və nəqliyyat-logistika potensialı təqdim edilib. Ardınca iştirakçılar üçün milli musiqi proqramı təşkil olunub.

Rəşad Nəbiyev çıxışında vurğulayıb ki, “Dayanıqlı nəqliyyatın maliyyələşdirilməsi” mövzusu infrastrukturun davamlılığı və dəyişən tələblərə uyğunlaşması baxımından balanslı investisiyaların vacibliyini ön plana çıxarır. Nazir qeyd edib ki, resursların düzgün bölüşdürülməsi və müasir texnologiyaların tətbiqi uzunmüddətli xərclərin azaldılması və nəqliyyat sistemlərinin effektivliyinin artırılması üçün əsas amillərdəndir.

Sammit iştirakçılarına Azərbaycanın nəqliyyat sektorunda həyata keçirdiyi təşəbbüslər, o cümlədən Orta Dəhliz üzrə icra olunan əsas infrastruktur layihələri barədə də məlumat verilib. Bildirilib ki, ölkədə rəqəmsal sistemlərə də ciddi investisiyalar yatırılır və bu addımlar dayanıqlı iqtisadi inkişafın dəstəklənməsinə xidmət edir.

Tədbir çərçivəsində forum tərəfdaşlarının məhsul, xidmət və innovativ həllərinin nümayiş olunduğu sərgi də təşkil edilib. Azərbaycan sərgidə milli stendlə təmsil olunur.

Yonq Te Kim, Patrik Şnayder və digər nümayəndə heyətlərinin rəhbərləri Azərbaycan stendi ilə tanış olublar. Ziyarətçilərə ölkənin nəqliyyat sektorunda əldə olunan nailiyyətlər və perspektivli layihələr barədə ətraflı məlumat təqdim olunub.

Günün sonunda Azərbaycan adından iştirakçılar üçün milli musiqi və rəqs nümunələrini əhatə edən bədii proqram təşkil edilib.