MOBİL RABİTƏ

Azercell daha bir ilkə imza atır. Belə ki, abunəçilərinə  daha rahat və keyfiyyətli xidmət təqdim etmək niyyətiylə şirkət tərəfindən yeni Mobil Müştəri Xidmətləri yaradılıb.

Şirkətdən Xəbərlər-ə verilən məlumata görə, Mobil Müştəri Xidmətləri qrupunun əsas məqsədi abunəçilərə daha yaxın olmaq, Azərbaycanın rayon və şəhərlərinə səfər edərək vətəndaşların  istək və gözləntilərni rahat və operativ şəkildə həyata keçirməkdir.

Yeni yaradılan bu xidmətin ilkin mərhələsində Müştəri Xidmətinin əməkdaşları Azercell Ekspres ofislərinin hələ fəaliyyət göstərmədiyi rayonlara və cəbhəyani bölgələrə  səfər edəcək. Səfərlər zamanı abunəçilərə Müştəri Xidmətləri və AzEx ofislərində Azercell tərəfindən təqdim olunan bütün xidmətlər göstəriləcək. Mobil Müştəri Xidmətinin əməkdaşları aprelin 27-dən   bu məqsəd üçün təşkil olunmuş xüsusi nəqliyyatla ilk olaraq Azercell-in Bəsti Bağırova küçəsi, 2 ünvanında yerləşən Müştəri Xidmətləri mərkəzindən yola düşərək Saatlı-İmişli, aprelin 28-də İmişli və Füzuli, aprelin 29-da Ağcabədi və Ağdamın Quzanlı qəsəbəsinə, aprelin 30-da isə Ağcabədi və Tərtərə səfər edəcəklər. Beləcə, Azercell-in Mobil Müştəri Xidmətləri ölkə boyu səfər edərək ən ucqar ərazilərdə belə abunəçilərinin istəklərini həll edəcək.

Qeyd edək ki, müştərilərə xidmət sahəsində bu konsepsiyaya ölkədə ilk dəfə məhz Azercell tərəfindən tətbiq olunur. 

Məltəm Talıbzadə