İNNOVASİYA VƏ STARTAP

Xeberler.az məlumat verir ki, Azərbaycan Texniki Universitetinin (AzTU) nəzdində fəaliyyət göstərən İnkubasiya Mərkəzində tələbələrdən ibarət texniki və təşkilati dəstək komandasının yaradılması məqsədilə görüş keçirilib.

Görüş zamanı komandanın strukturunun formalaşdırılması, fəaliyyət istiqamətlərinin müəyyənləşdirilməsi və mərkəzin iş prosesində rolunun gücləndirilməsi müzakirə olunub. Bildirilib ki, bu komanda işlərin daha səmərəli təşkili, tapşırıqların düzgün bölüşdürülməsi və müxtəlif fəaliyyətlərin koordinasiyalı icrası baxımından mühüm rol oynayacaq.

Məlumata əsasən, dəstək komandası texniki nəzarət, tədbirlərin təşkili, sosial media və dizayn işləri, eləcə də rəqəmsal platformaların kontent idarə olunması istiqamətlərində fəaliyyət göstərəcək. Komanda üzvləri həmçinin tədbirlərin operativ təşkili və iştirakçıların yönləndirilməsində aktiv rol alacaqlar.

Görüş çərçivəsində tələbələrlə müzakirələr aparılıb, onların maraqları öyrənilib və təklifləri dinlənilib. İştirakçılara komandanın fəaliyyət prinsipləri və inkişaf imkanları barədə məlumat verilib.

Qeyd olunub ki, belə bir komandanın yaradılması artan layihə və tədbirlərin effektiv idarə olunmasına, eləcə də mərkəzin fəaliyyətində operativlik və peşəkarlığın artırılmasına xidmət edir. Eyni zamanda, bu təşəbbüs tələbələrin praktiki bacarıqlarının inkişafı üçün mühüm imkan yaradır.

AzTU İnkubasiya Mərkəzinin dəstək komandası aşağıdakı qruplardan ibarətdir:

• Moderator (Texniki nəzarət – sayt): Kənan Məmmədli
• Təşkilati dəstək: Sənan Mirzəyev
• Yaradıcı və media komandası: Aydan Orucəliyeva, Əsmər Yarıyeva, Elza Abbasova
• Rəqəmsallaşma işlərinə dəstək: Kənan Rzayev, Fərid Mustafayev
• Tədbir dəstəyi: Nərmin Məmmədova, Məleykə Ağazadə, Nərmin Mustafayeva, Zəhra İsmayılzadə

Sonda qeyd olunub ki, yaradılan bu komanda İnkubasiya Mərkəzinin fəaliyyətinin daha sistemli təşkilinə və tələbələrin innovasiya mühitində fəal iştirakına mühüm töhfə verəcəkdir.