TƏDBİRLƏR

Big Data Day Baku 2016, böyük həcmli verilənlər mövzusunda keçirilən tədbirdir və bu il Bakıda 2-ci yaşını qeyd edəcək.

Xeberler.az-ın məlumatına görə, bu konfrans QU texnoparkın nəzdində fəaliyyət göstərən CeDAWI (Center of Data Analytics and Web Insights) araşdırma mərkəzi, IEEE Kompyuter Cəmiyyətinin Azərbaycan şöbəsi və bir sıra tanınmış yerli və xarici şirkətlərin birgə təşkilatçılığı ilə  mayın 17-də Qafqaz Universitetində keçiriləcək.

Konfransda bizneslər və təşkilatlar (Maliyyə, Bank, Enerji, Pərakəndə, Telekom, Marketinq, sövlət, Kiber-Təhlükəsizlik, Səhiyyə), sahibkarlar, İT mütəxəssislər, tələbələr (tələbələrin iştirakı çox əhəmiyyətlidir), alimlər və tədqiqatçılar, dövlət nümayəndələri iştirak edəcək.

Tədbirin əsas məqsədi, cəmiyyətdə Böyük Həcmli Verilənlərin (Big Data) gətirdiyi yeni imkanlar və çətinliklər haqqında fikirləri daha da artırmaq, sənaye və dövlət orqanları ilə verilənlərin analizi texnologiyalarının inkişafına dair təcrübələri paylaşmaq, tələbələri və gənc tədqiqatçıları bu sahədə karyera qurmağa və Verilənlər Elmi (Data Science) sahəsində tədqiqat aparmağa həvəsləndirməkdir.

   Əhatə olunacaq  mövzular:

•  Verilənlər elmindəki aktual mövzular
• Böyük həcmli verilənlərin gətirdiyi böyük imkanlar və çətinliklər – Böyük həcmli verilənlərdən istifadə halları
• Çox-sahəli sənayedə böyük həcmli verilənlərin təsiri
• Təbii Dil Texnologiyaları – NLP və Kompyuter Linqvistikası
• Böyük həcmli verilənlər üçün açıq qaynaqlı platformalar
• Böyük həcmli verilənlər və Analizi  - Yaşam Dövrü
• (I|P|S|.)aaS anlayışları və platformaları
• Böyük həcmli verilənlər sənayesində kim kimdir?
• Açıq Verilənlərə Təşəbbüs

 Cavablandırılacaq suallar:

• Böyük Həcmli Verilənlərin dəyəri nədir?
• Bu bizə necə təsir edəcək?
• Böyük Həcmli Verilənlər erası - biz buna hazırıqmı?

 Tədbirdə iştirak üçün buradan qeydiyyatdan keçmək lazımdır.

Məltəm Talıbzadə