Bakutel 2015 sərgisi işə başladı

02-12-2015 11:45

Bu gün Bakı Ekspo Mərkəzində İKT üzrə ən iri ixtisaslaşmış tədbir - Bakutel 2015 21-ci Azərbaycan Beynəlxalq Telekommunikasiya və İnformasiya Texnologiyaları sərgisi öz qapılarını ziyarətçilərin üzünə açıq elan edib.

Xeberler.az-ın məlumatına görə, əvvəlki illərə nisbətən sərgiyə daha çox maraq müşahidə olunur. Əvvəlki illərdən fərqli olaraq bu il mərkəzin giriş hissəsində də stendlər qurulur.

Rabitə və yüksək texnologiyalar nazirinin birinci müavini Ramin Quluzadə də tədbirdə iştirak edir. Nazir stendlərlə tanış olub və fikirlərini bildirib.

Ramin Quluzadə bildirib ki, hər il keçirilən ənənəvi Bakutel sərgisi Azərbaycan üçün İKT sahəsində yeni əməkdaşlıqlara yol açır. O bildirib ki, ölkəmiz son illərdə iqtisadi baxımdan sürətlə inkişaf edir və İKT də bu inkişafa qoşulub və prezident tərəfindən prioritet sahə kimi qiymətləndirilib.

O, vurğulayıb ki, Azərbaycan regionda İKT üzrə lider ölkələrdən biridir. Kosmik sənayenin inkişafı sürətlə artır.

Nazir müavini Elmir Vəlizadə stendlərlə tanış olub. Nazir müavini stendlərlə tanışlıqdan sonra jurnalistlərə tədbirlə bağlı ilkin təəssüratlarını bildirib. Həmçinin, sərgidə startapçılarımız da Applab layihəsi ilə təmsil olunurlar.

Bu il sərgidə ilk dəfə olaraq AVAYA, Google, Kasperskiy Laboratoriyası və digər aparıcı dünya şirkətləri iştirak edirlər.

Azərkosmos və Arianespace şirkətləri arasında Azerspace-2 ikinci telekommunikasiya peykinin kosmik fəzaya buraxılması haqqında sazişin imzalanması Bakutel 2015 sərgisinin işgüzar proqramı çərçivəsində keçirilir.

Həmçinin, Bakcell və Azercell şirkəti də mətbuat konfransı keçirəcək və məhsulları barədə məlumat verəcək.

Sərginin iştirakçıları arasında ACER, Avirtel, Azercell Telecom, Azerkosmos, Azerfon, Azqtel, Airbus, Bakcell, BestComp Group, CISCO, Delta Telecom, Digital Source, HP, Huawei, IBM, LENOVO, R.I.S.K. Company, SAP, SINAM, Smart Systems Technology, Softline International, Schneider, Sumqayıt Tenologitya Parkı, Teleradio, Ultra Technologies, ZTE və digər bu kimi aparıcı İKT şirkətləri, habelə Azərbaycanın mobil rabitə operatorları, internet provayderləri və sistem inteqratorları, eləcə də tanınmış brendlərin distributorları var. Eurodesign şirkəti ardıcıl olaraq ikinci ildir ki, sərginin qeydiyyat sponsorudur. İlk dəfə olaraq, Bakutel 2015 sərgisinin kommunikasiya sponsoru qismində ölkənin ilk mobil operatoru - Bakcell şirkəti çıxış edir.