İnnovasiya və Rəqəmsal İnkişaf Agentliyinin təşəbbüsü və
PASHA Holding LLC Şirkətlər Qrupunun sponsorluğu ilə dünyanın nüfuzlu məktəblər şəbəkəsi
Holberton School Azərbaycanda fəaliyyətə başlayır.
İKT sahəsində insan kapitalının inkişafı məqsədilə atılan addımlar innovasiya və rəqəmsallaşmanın təşviqi baxımından ölkəmiz üçün prioritet sahələrdən biridir. Davam edən bu fəaliyyətin bir hissəsi kimi ölkənin rəqəmsal mənzərəsinin tərəqqisinə təkan verəcək addımlardan biri də “Holberton” ilə əsası qoyulan əməkdaşlıqdır.
Bu tədris mərkəzi Silikon Vadisindən yüksək keyfiyyətli texnoloji proqramlarla innovativ və praktik metodologiya vasitəsilə gələcəyin İKT kadrlarını yetişdirir.
İRİA və “Holberton”un əməkdaşlığı çərçivəsində ölkəmizdə İKT üzrə təhsil almaq istəyən 18 yaşdan yuxarı hər kəs bu imkandan yararlana biləcək.
Proqrama müraciətin ilkin mərhələsində namizədlərin məntiqi və analitik düşüncə qabiliyyəti yoxlanılacaq. Seçim prosesi ingilis dilində olacaq və bu səbəbdən namizədlərin ingilis dili biliyinin olması zəruridir. Onu da qeyd edək ki, seçim mərhələlərində kompüter elmləri və ya proqramlaşdırma bilikləri tələb olunmayacaq. Seçim prosesini uğurla başa vuran 60 şəxs tam təqaüdlü təhsil hüququ qazanacaq.
Tələbələr ilk 9 ayda təməl İKT bacarıqlarını mənimsədikdən sonra kiçik proqram təminatı mühəndisi kimi işləyə və ya proqramın təqdim etdiyi digər altı ixtisasdan birinə müraciət edə bilərlər.
Müraciət üçün son tarix: 28 sentyabr 2023
