TƏDBİRLƏR

Avropa Birliyinin TEMPUS proqramı çərçivəsində həyata keçirilən ECONANO layihəsinin növbəti seminar-mitinqi Yunanıstanın Patras Universitetində keçirilib.
 
Xeberler.az-a Bakı Dövlət Universitetinin mətbuat xidmətindən bildirilib ki, seminarda  İtaliyanın Sapienza, Fransanın Paris 13, o cümlədən Bakı  Dövlət, Azərbaycan İnşaat və Memarlıq və Qafqaz universitetlərinin nümayəndələri iştirak ediblər. Layihənin rəhbəri, professor Luca Di Palma, Azərbaycan universitetləri üzrə Koordinator professor Məhəmmədəli Ramazanov görülən işlər üzrə məlumat verib və gələcək perspektivlər müzakirə edilib.
 
Seminarda həmçinin “Ekologiya mühəndisliyi” üzrə yeni magistr proqramının yaradılması haqqında danışıqlar olub, ECONANO layihəsinin müvəffəqiyyətlə yerinə yetirilməsi üçün bütün əsasların olduğu qeyd edilib. Eyni zamanda yeni təhsil və elmi-tədqiqat layihəsinin hazırlanması ilə əlaqədar razılıq əldə olunub.
 
Qeyd edək ki, ECONANO layihəsinin əsas məqsədi Azərbaycanda “Ekologiya mühəndisliyi” (EM) üzrə mövcud tədris proqramlarının daha müasir və təkmil kursların daxil edilməsi yolu ilə, xüsusilə nanomaterialların ətraf mühitin mühafizəsində tətbiqi və monitorinqini nəzərə alaraq modernləşdirilməsidir.
Layihədə EM tədris proqramlarının islahatı magistratura pilləsində aparılacaq və eyni zamanda bakalavriat pilləsində keçirilən ekoloji fənlərin korrektə olunması da nəzərdə tutulub. 
 
Eyni zamanda layihədə iştirak edən İtaliya, Fransa və Yunanıstan universitetləri ilə Azərbaycan universitetlərinin əməkdaşlığı möhkəmləndirilir və inkişaf etdirilir. Layihə çərçivəsində nanotexnologiyanın nailiyyətlərindən istifadə edərək, Azərbaycanın ali təhsil sistemində və Şərqi Avropa ölkələrində “Ekologiya mühəndisliyi” üzrə magistr pilləsi üçün kurrikulumun modernləşdirilməsi və islahatı həyata keçiriləcək.

Eyni zamanda tərəfdaş ölkələrin və Avropa İttifaqına üzv dövlətlərin ali təhsil müəssisələri və elmi tədqiqat institutları arasında şəbəkə artırmaq da layihənin əsas istiqamətlərindəndir.

Xeberler.az