RƏQƏMSAL DÜNYA

Azərbaycan İnternet Forumunun Prezidenti Osman Gündüz Xankəndidə keçirilən “SOCGOV 2026” forumunun Yekun Bəyanatı ilə bağlı fikirlərini sosial şəbəkə hesabında bölüşüb.

Xeberler.az bildirir ki, o, bəyanatda dövlət sektorunda və sosial idarəetmədə data analitikası, süni intellekt imkanlarının müzakirəsinin, insan hüquqlarının, şəffaflığın və fərdi məlumatların qorunmasının önə çəkilməsini müsbət qiymətləndirib. Lakin O. Gündüzün sözlərinə görə, elan olunan prinsiplər məntiqli olsa da, həddindən artıq ümumidir və qlobal miqyasda süni intellektlə bağlı səsləndirilən çağırışlardan çox fərqlənmir.

Əmək və Əhalinin Sosial Müdafiəsi Nazirliyi və DOST sistemində ölkənin ən böyük İT infrastrukturunun, rəqəmsal xidmətlərin və süni intellekt həllərinin olduğunu xatırladan O. Gündüz bildirib ki, bu qurumlarda toplanmış praktik təcrübədən çıxan konkret nəticələrin bəyanatda əks olunması gözlənilirdi.

O, bir sıra sualları gündəmə gətirib:

• Bu qurumlarda mövcud İT və süni intellekt infrastrukturundan hansı dərslər çıxarılıb?
• Hansı həll vətəndaşın işini asanlaşdırıb, hansı tətbiqdə problem yaranıb?
• Sosial idarəetmənin rəqəmsallaşması hansı riskləri üzə çıxarıb və onları azaltmaq üçün nə təklif olunur?
• Sistemdəki səhv məlumat və ya süni intellektin iştirakı ilə verilən qərar vətəndaşın sosial yardımdan, pensiyadan və digər hüquqlardan istifadəsinə mane olubmu?
• Süni intellekt səhv etdikdə vətəndaş imtinanın səbəbini anlaşıqlı şəkildə öyrənə, səhvi düzəltdirə və qərara səlahiyyətli şəxs tərəfindən yenidən baxılmasını tələb edə bilərmi?

O. Gündüz vurğulayıb ki, məqsədi böyük tədbirin əhəmiyyətinə kölgə salmaq deyil, qurumun potensial imkanlarını nəzərə alaraq gözləntiləri ifadə etməkdir. Onun fikrincə, bəyanatda artıq məlum prinsiplərlə yanaşı, yerli risklər, öyrənilən dərslər və konkret növbəti addımlar da öz əksini tapa bilərdi. Həmçinin təcrübəyə əsaslanan çağırışlarla qlobal auditoriyaya müraciət etmək mümkün idi.