Xeberler.az bildirir ki, bunu Azərbaycan İnternet Formunun Prezidenti, ekspert Osman Gündüz deyib.
Ekspertin sözlərinə görə, RİNN-in elektron imzası mobil olmadığından uzun illərdi ki, "ASAN İmza" bizim bazarda hökmranlıq edir. Bu faktın özü, yəni ölkənin bütün imza infrastrukturunun xarici bir ölkəyə məxsus sistem üzərində "oturması" da absurd bir vəziyyətdir.
"Ölkənin informasiya təhlükəsizliyinə cavabdeh olanlar da bu məsələdə acizdirlər. İmza məsələsində situasiyanı dəyişə biləcək yeni nəsil şəxsiyyət vəsiqələrindəki imzanın aktivləşməsinə də uzun illər kimlərsə imkan vermədilər. Vəsiqələr verildi, amma imzalar aktivləşmədi".
Osman Gündüz bildirib ki, daha bu formada, yəni şəxsiyyət vəsiqəsindəki yeni nəsil imzaya da ehtiyac yoxdur. Artıq əlavə kart vasitəsilə oxunmasına ehtiyac olan bu tip elektron imzaların da dövrü bitib.
"Dövlət büdcəsindən də xeyli vəsaitlər xərclənmişdi yeni nəsil imza infrastrukturunun qurulmasına. İnfrastruktur quruldu, amma naməlum qüvvələr imzanın tətbiqinə imkan vermədi.
Təəssüf ki, cavabdehlər zamanında imzanı tətbiq edə bilmədilər və artıq bu layihə öz əhəmiyyətini də itirib".
Ekspert güman edir ki, indi Azİntelecom məhz bütün bunları nəzərə alaraq daha müasir, rəqəmsal, telefon nömrəsinə bağlı olmayan bir mobil imza təqdim etmək niyyətindədir.
"Biz dəfələrlə təklif etmişdik ki, bu inhisarçılıqdan qurtulmaq lazımdır, ASAN Xidmət özünə dəxli olmayan brendə sahib çıxmalıdır, eGov Mərkəzi yeni mobil imza infrastrukturu yaratmalıdır.
Görünür ki, indi ASAN və RİNN arasında anlaşma olub ki, RİNN bazara yeni imza sistemi çıxartsın.
