"Ötən gün Mərkəzi Bankın rəhbəri Taleh Kazımovun ekspertlərlə görüşündə öyrəndik ki, nəhayət, Vençur maliyyələşmə haqqında qanun layihəsi tam hazırlanıb və hökumətə təqdim olunub".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Ekspert bildirir ki, bu xəbəri eşidəndə, ilk ağlına gələn – təxminən 10 ildir bu qanunun müxtəlif versiyalarının hazırlanıb, sonra da “haradasa ilişməsi” olub:
"İllərdir RİNN, İqtisadiyyat Nazirliyi, ASAN, KOBİA ayrı-ayrılıqda layihələr hazırladılar, lakin heç biri razılaşma mərhələsindən keçə bilmədi.
Bəlkə də mövcud mənasız qısqanclıqlar, səlahiyyət iddiaları da bu prosesin irəliləməsinə imkan vermədi. Halbuki bu, sadəcə 7-10 maddəlik bir qanundur.
Həmin boşluq ucbatından startap ekosistemi investisiyadan məhrum qaldı, yeganə yaradılan dövlət Fondu – Caucasus Ventures – bir müddət fəaliyyətini qura bilmədi, sonra da qapalı fəaliyyətə üstünlük verdi.
11 milyonluq büdcəsi olsa da, cəmi 1.5 milyon dollarlıq yatırım edə bildi. Onun da çoxu xarici qeydiyyatlı startaplara getdiyindən, Mərkəzi Bank fondun valyuta əməliyyatlarının qanuna uyğun olmadığını bildridi".
Osman Gündüz bildirib ki, Gürcüstanda 25 milyon, Ermənistanda 124 milyon, Qazaxıstanda 80, Özbəkistanda 70 milyon dollar vençur yatırımı olan bir vaxtda, bizim hesabatlılığı və şəffaflığı yetərli olmayan “yetim fond”muzun da hesabları bloklandı:
"Amma görünür, bu dəfə məsələ ciddidir. Mərkəzi Bank təşəbbüsü üzərinə götürüb və qanun layihəsi artıq razılaşdırma mərhələsindədir.
Güman ki, bu prosesə illər əvvəl Mərkəzi Bank cəlb olunsaydı, yəqin ki, bu qanun çoxdan qüvvəyə minmişdi.
Ümid edirik ki, bu dəfə sənəd yenə hansısa “əmma”ya ilişməyəcək, razılaşdırmalar uzanmayacaq və ilin sonunadək ölkəmiz ilk Vençur Qanununa sahib olacaq".
