PROQRAMLAR

Azərbaycanın Müstəqillik Günü münasibətilə Azərbaycan Respublikasının Niderland Krallığındakı Səfirliyi tərəfindən Haaqada təşkil olunmuş rəsmi qəbul zamanı Azərbaycan-Niderland Ticarət Palatası təsis edildiyini elan edib. Bu, Azərbaycan və Niderland arasında iqtisadi əlaqələrin möhkəmləndirilməsi və biznes əməkdaşlığının genişləndirilməsi istiqamətində mühüm mərhələ hesab olunur.

Azərbaycan və Niderlandın aparıcı şirkətlərini bir araya gətirən Palata, ikitərəfli biznes əlaqələrinin inkişafı, investisiya və bilik mübadiləsinin təşviqi, hər iki bazarda dayanıqlı iqtisadi inkişafın dəstəklənməsi məqsədilə birgə təşəbbüs əsasında təsis olunub. Müstəqil biznes platforması olaraq Palata ikitərəfli ticarət və investisiyaların dəstəklənməsini, biznes icmaları arasında dialoqun təşviqini, bilik mübadiləsinin genişləndirilməsini və hər iki ölkə arasında uzunmüddətli kommersiya tərəfdaşlıqlarının inkişafına töhfə verməyi hədəfləyir.

Təşəbbüs Niderland və Azərbaycan bazarlarında müxtəlif sahələri və peşəkar təcrübəni təmsil edən təsisçi-üzvlərin birgə səyləri ilə reallaşdırılıb. NEQSOL Holding Palatanın yaradılmasının dəstəklənməsində əhəmiyyətli rol oynayıb.

Palatanın təsisçi üzvlər siyahısına daxildir:

 Royal Dutch LV Logistics
 NEQSOL Holding
 Haskoning Nederland B.V.
 DAMEN Shipyards Group
 Signify
 TAMM Solutions B.V.
 AZ Legal Services B.V.
 Van Oord Dredging and Marine Contractors B.V. (Azərbaycan filialı)
 BDO Azerbaijan LLC
 TRAST BV

Palatanın təsisçi İdarə Heyəti Azərbaycan və Niderland biznes icmalarını təmsil edən nümayəndələrdən ibarətdir:

Arjan Bos - Palatanın sədri; Royal Dutch LV Logistics şirkətinin Co-CEO-su və Qlobal İcra Şurasının üzvü
İmran Əhmədzadə - İdarə Heyətinin üzvü; NEQSOL Holding-in Baş Maliyyə Direktoru və NEQSOL Holding Azərbaycan ofisinin rəhbəri
Paul Gielen - İdarə Heyətinin üzvü; TRAST BV şirkətinin regional meneceri

Bu tərkib Palatanın ikitərəfli xarakterini, eləcə də həm Azərbaycandan, həm də Niderlanddan biznes liderlərini və peşəkar təcrübəni bir araya gətirmək öhdəliyini əks etdirir. Palatanın sədri Arjan Bos bildirib: “Azərbaycan və Niderland arasında mövcud iqtisadi münasibətlə əməkdaşlığın daha da genişləndirilməsi üçün möhkəm zəmin yaradır. Palata biznesləri daha güclü əlaqələndirmə, praktiki əməkdaşlıq və uzunmüddətli tərəfdaşlıqların inkişafı vasitəsilə dəstəkləmək məqsədilə təsis edilib. İnanırıq ki, bu platforma şirkətlərə yeni tərəfdaşlıqlar qurmağa, imkanlardan daha səmərəli şəkildə yararlanmağa və iki ölkə arasında dayanıqlı iqtisadi inkişafa töhfə verməyə kömək edəcək”.

Palatanın İdarə Heyətinin üzvü İmran Əhmədzadə şərh edib: “Həm Azərbaycan, həm də Niderlandda güclü iştirakımız və geniş əlaqələrimiz sayəsində Palata əməkdaşlıq imkanlarını əlaqələndirmək, Azərbaycanın güclü inkişaf nailiyyətlərini və ambisiyalarını Niderlandın təcrübəsi və qlobal platformalar ilə əlaqələndirmək üçün unikal mövqeyə malikdir. Bu səyahətə birlikdə başlamaqdan şərəf duyuruq və inanırıq ki, bu, uzunmüddətli və uğurlu tərəfdaşlığa çevriləcək”.

Palatanın İdarə Heyətinin üzvü Paul Gielen qeyd edib: “Palatanın yaradılması yalnız iqtisadi əlaqələrin gücləndirilməsi ilə məhdudlaşmır. Bu, əməkdaşlıq, qarşılıqlı hörmət və ortaq dəyərlər əsasında etibarlı peşəkar icmanın formalaşdırılması deməkdir. Palatanın uğuru son nəticədə onun icması ilə müəyyən olunacaq və əməkdaşlıq, açıqlıq və ortaq hədəflər sayəsində biznesin inkişafını dəstəkləməklə yanaşı, Azərbaycan və Niderland arasında münasibətlərin və qarşılıqlı anlaşmanın daha da möhkəmlənməsinə töhfə verəcək platformanın yaradılacağına inanırıq.”

Azərbaycan-Niderland Ticarət Palatası ikitərəfli biznes əlaqələrinin daha da inkişafına töhfə verməkdə maraqlı olan təşkilatlarla əməkdaşlığa açıqdır və Azərbaycan ilə Niderland arasında iqtisadi əməkdaşlığı gücləndirəcək gələcək təşəbbüsləri dəstəkləməyi hədəfləyir.