TƏDBİRLƏR

AMEA-nın vitse-prezidenti, akademik Rasim Əliquliyev FRTEB-in Ümumi yığıncağının onlayn iclasında son dövrlərdə AMEA-da aparılan islahatlar çərçivəsində FRTEB-in elmi müəssisələrində çalışan əməkdaşların attestasiyasının nəticələrindən bəhs edib.

Xeberler.az-ın məlumatına görə, ademik bildirib ki, attestasiyanın keçirilməsində əsas məqsəd əməkdaşların peşəkarlıq səviyyəsinin monitorinqi, onların tutduğu vəzifələrə uyğunluğunun müəyyənləşdirilməsi, elmi məhsuldarlğının və səmərəliliyinin yoxlanılmasıdır.

AMEA-nın elmi-texniki potensialının qorunub saxlanılması və inkişaf etdirilməsi məsələsinə toxunan alim Akademiyanın müəssisə və təşkilatlarında fəaliyyət göstərən yüksəkixtisaslı kadrların fəaliyyətinin qiymətləndirilməsi, beynəlxalq elmi bazalarda məqalələr dərc etdirən alimlərin əməyinin stimullaşdırılması, prioritet istiqamətlər üzrə aparılan tədqiqatlara dəstək göstərilməsinin əhəmiyyətindən danışıb.

“Əməkhaqlarında ciddi fərq olduğu üçün çoxlu sayda elmlər və fəlsəfə doktorları öz fəaliyyətini digər qurumlarda davam etdirirlər”, - deyən Rasim Əliquliyev əlavə edib ki, bu vəziyyətin yaranma səbəbləri dərindən araşdırılmalı, təxirəsalınmaz tədbirlər həyata keçirilməlidir. Elmin maliyyələşdirilməsində yeni mexanizmlərin formalaşdırılması zərurətini diqqətə çatdıran akademik Rasim Əliquliyev elmi problem yönümlü ünvanlı maliyyələşməyə keçidin vacibliyini qeyd etdi.

Gənc, istedadlı kadrların elmə cəlb edilməsinin, müasir dövrün çağırışlarına cavab verən yeni ixtisaslar və bilik sahələri üzrə kadrların hazırlanmasının AMEA-nın qarşısında duran əsas hədəflərdən olduğunu söyləyən vitse-prezident gənclərin müxtəlif dövlət proqramlarında iştirakının təmin edilməsi, onların xarici ölkələrin nüfuzlu universitetlərində təhsil alamaları, o cümlədən öz bilik və bacarıqlarını reallaşdırmaları üçün lazımi şəraitin yaradılmasının vacibliyini diqqətə çatdırıb.

Sonda akademik Rasim Əliquliyev FRTEB-in elmi müəssisə və təşkilatlarında fəaliyyət göstərən əməkdaşların attestasiyasının nəticələrini diqqətə çatdırıb. Alim bu prosesin cari ilin sonuna kimi davam edəcəyini söyləyib, attestasiyanın şəffaf keçirilməsinin AMEA-nın gələcək inkişafı və fəaliyyətinin daha səmərəli təşkili baxımından mühüm əhəmiyyət kəsb etdiyini vurğulayıb.