TEXNOLOGİYA

Mayın 22-də AMEA İnformasiya Texnologiyaları İnstitutunda Qadınlar Şurasının təsis toplantısı keçirilib.

Bu barədə Xeberler.az-a AMEA-dan məlumat verilib.

Tədbiri giriş sözü ilə açan akademik Rasim Əliquliyev cari ilin aprel ayında AMEA-da Qadınlar Şurasının təsis edildiyini diqqətə çatdıraraq institutda da belə bir şuranın yaradılmasının zəruri olduğunu vurğulayıb.

“Qadınların hüquqlarının qorunması və onların ölkənin ictimai-siyasi həyatında fəal iştirakı dövlət başçısının da daim diqqət mərkəzində saxladığı məsələlərdəndir”, – deyə bildirən alim ölkədə bu istiqamətdə görülən tədbirlərin gender problemlərinin həllinə böyük töhvə verdiyini qeyd edib.

Qadınların vətəndaş cəmiyyəti quruculuğu və elmin inkişafında müstəsna xidmətləri olduğunu vurğulayıb.

R.Əliquliyev rəhbərlik etdiyi elmi müəssisədə çalışan əməkdaşlar arasında qadınların sayca üstünlük təşkil etdiyini, onların müasir dövrün çağırışlarına cavab verən prioritet elmi istiqamətlərdə tədqiqatlar apardıqlarını bildirib.

Alim AMEA rəhbərliyinin Qadınlar Şurasının yaradılmasına xüsusi əhəmiyyət verdiyini vurğulayaraq, şuranın fəaliyyətinin səmərəli təşkili üçün hər zaman dəstək göstərməyə hazır olduğunu deyib. Qadınları institutun qarşısında duran vəzifələrin həyata keçirilməsində fəal iştirak etməyə çağırıb.

İclasda institutun baş elmi işçisi, texnika üzrə fəlsəfə doktoru, dosent Zərifə Cəbrayılovanın institutun Qadınlar Şurasının sədrliyinə, institutun sektor müdiri, texnika üzrə fəlsəfə doktoru Rəna Qasımovanın şuranın sədr müavinliyinə namizədliyi səsə qoyuldu və yekdilliklə qəbul olundu.

Sonra səsvermə yolu ilə şuranın üzvləri seçilib.

Xeberler.az