STARTAP AZƏRBAYCAN

Məlum olduğu kimi, son illər Azərbaycan regionlarının inkişafına diqqət artırılıb. Gəncə də ölkənin ən inkişaf etmiş bölgələrindən birinə çevrilib.

Gəncə şəhərinin 2016-cı ilin Avropa gənclər paytaxtı seçilməsi Gəncəyə diqqəti daha da artırıb.

Məlumat verdiyimiz kimi, ilin əvvəlində də Gəncədə Startap Azərbaycan tərəfindən tələbə və gənclərin iştirakı ilə startap tədbirləri təşkil olunmuşdu. İlin sonunda isə burada startap görüşlərinin davam etdirilməsi nəzərdə tutulurdu.

Xeberler.az-ın məlumatına görə, bu dəfə Gəncədə daha böyük miqyasılı startap tədbirlərinin keçirilməsi nəzərdə tutulur. Belə ki, gələn ay Startap Azərbaycan və ASAN Könüllüləri qurumu Gəncədə bir neçə startap tədbirləri həyata keçirməyə hazırlaşır.

ASAN Könüllüləri Təşkilatı və Startap Azərbaycanın birgə təşkilaçılığı ilə 25-30 noyabrda Gəncədə “Azərbaycan Startup Festivalı” təşkil olunacaq.  Festival çərçivəsində Startap Günləri və “1-ci Beynəlxalq Startup Akademiyası:Gəncə 2016” və digər tədbirlərin keçirilməsi planlaşdırılır.

Qeyd edək ki, startap ideyası olan, öz startapını qurmaq istəyən, İT sahəsində fəaliyyət göstərən hər bir gənc bu festivalda iştirak etmək üçün müraciət edə bilər.

Onu da bildirək ki, Startap Günlərində iştirak pulsuzdur. Məlumata görə, Gəncədə keçiriləcək Startap Günlər-i 3 gün davam edəcək.

Yarışmaya Gəncədəki universitetlərdən tələbələr və gənclər qatıla bilər.

Startap Azərbaycan layihəsinə Rabitə və Yüksək Texnologiyalar Nazirliyi, Yüksək Texnologiyalar Parkı , İT-nin İnkişafına Dəstək Dövlət Fondu və bir sıra İT şirkətlər dəstək verir.

Bu barədə daha ətraflı Startap Azərbaycan rəsmi saytındakı Startap Günləri bölməsindən məlumat əldə edə bilərsiniz.

Məltəm Talıbzadə