Gürcüstanda iki gün öncə baş tutan parlament seçkilərdə 90% seçici elektron formada səs verib. Bu forma son iki ildə pilot qaydada reallaşdırılırdı.
Qeyd edək ki, bu seçki forması, internet üzərindən, onlayn səsvermə anlamına gəlmir.
Gürcüstanın elektron səsvermə sistemi seçicilərin oflayn olaraq seçki məntəqəsində elektron terminalla təmin edilərək səsverməsini, səslərin avtomatik olaraq hesablanmasını və nəticələrin dairə və mərkəzi sistemə ötürülməsini nəzərdə tutur.
Seçki əntəqələrində səs vermək üçün nəzərdə tutulan elektron cihazların internetə bağlantısı yoxdur, sistem oflayn rejimdə işləyir.
Seçici məntəqəyə gələrək, elektron şəxsiyyət vəsiqəsindən istifadə edənlər elektron formada, digərləri isə oflayn formada qeydiyyatdan keçirlər.
Seçici ona təqdim edilən terminalda namizədlərin siyahısını görür və səsverməni icra edir. Səsvermə bitdikdən sonra səslərin qəbul edildiyi təsdiqlənir və cihaz səsləri avtomatik hesablayir.
Qeyd edək ki, ənənəvi büllütenlərdə səsverənlərin səslərinin sayı da əl ilə sayılmır, bülletenlər xüsusi skanerlər vasitəsilə rəqəmsal formata keçirilir və avtomatik olaraq hesablanır.
Bir neçə gün öncə keçirilən parlament seçkilərində məntəqələrin böyük əksəriyyətində, təxminən 90%-də elektron səsvermə terminalları yerləşdirilib.
MSK elektron səsvermə keçiriləcək məntəqələri öncədən müəyyən edib.
Məsələyə Azərbaycan İnternet Formunun Prezidenti, ekspert Osman Gündüz münasibət bildirib.
Osman Gündüz qeyd edib ki, Gürcüstanda keçirilən seçkilərldə seçki prosesləri əsasən rəqəmsallaşdığından MSK seçki bitən anda, dərhal ilkin nəticələri elan edib, iqtidarın seçki bloku “Gürcü Arzusu” 54%, müxalifət isə təxminən 37% əldə edib.
Müxalifət bununla razılaşmayıb. Seçkinin saxtalaşdırıldığını, nəticələri tanımadığı elan edib.
Ekspertin sözlərinə görə, müxalifətin saxtalaşdırma ilə bağlı irəli sürdüyü arqumentlər içərisində texnologiya ilə əlaqəli məqamlar gözə dəymir:
"Yəni müxalifər saxtalaşdırmanın səsvermə cihazları və ya digər texnoloji məsələlərlə əlaqəli deyil, inzibati resurslar və seçicilərə təsir etməklə həyata keçirildiyini iddia edirlər. Gürcüstanın seçki proseslərini rəqəmsallaşdırması, səsvermə prosesində innovasiyalardan və rəqəmsal texnologiyalardan istifadə etməsi yetərincə diqqət cəlb edəndir".
Sonda Osman Gündüz ümid edir ki, bizim MSK və İRİA da qarşıdakı seçkilərdə innovasiyalara və elektron səsvermə texnologiyalarına üstünlük verəcəklər.
