İKT VƏ SEÇKİ

Rəqəmsal texnologiyaların tətbiq olunması seçki prosesində çeviklik və effektivliyin artırılmasına xidmət edir. Azərbaycanda da bu istiqamətdə mühüm addımlar atılıb. Beynəlxalq təcrübədə özünü təsdiqləmiş son rəqəmsal yeniliklər 7 fevral seçkilərinin bütün mərhələləri üzrə tətbiq edilib.

Xeberler.az  xəbər verir ki, bunu “secki-2024.az” saytına açıqlamasında Azərbaycan İnternet Forumunun (AİF) prezidenti Osman Gündüz söyləyib.

AİF prezidenti bildirib ki, seçici siyahılarının elektronlaşdırılması, məntəqələrdə veb-kameraların quraşdırılması və bu kimi digər tədbirlər ölkəmizdə keçirilən seçki prosesində müasir texnologiyalardan istifadənin real təsdiqidir. “Seçki prosesinin rəqəmsal transformasiyası ilə bağlı addımlar davam etdirilir. Seçici siyahılarının, həmçinin seçki dairələri və məntəqələri ilə bağlı informasiyaların internet üzərindən əlçatan olması, gözdən əlil və hərəkət məhdudiyyəti olan insanlara səsvermə prosesində rahat, gizli səsverməsi üçün şəraitin yaradılması, veb-kameraların quraşdırılması, barmaqların rənglənərək yoxlanması kimi məsələlər təqdirəlayiqdir”, - deyə o əlavə edib.

Osman Gündüzün sözlərinə görə, texnologiya modernləşdikcə seçki prosesində rəqəmsal texnologiyadan istifadənin sərhədləri də genişlənir. Məsələn, vətəndaşların elektron şəkildə identifikasiyası üzrə məsələ aktuallıq daşımağa başlayıb. Hətta pilot qaydada elektron səsvermədən istifadə məsələləri sınaqdan keçirilir. Fikrimcə, bu yeniliklər təcrübədə təsdiqləndikcə Azərbaycanda da tətbiqi reallaşacaq.