TƏHLÜKƏSİZLİK

Cenevrdə yaşayan həmyerlimizin elmi işi İT sahəsində nüfuzlu Elsevier nəşriyyatında çap edilən "Computer and Information Security Handbook" kitabında dərc edilib.

Xeberler.az-ın məlumatına görə, Emin Hüseynovun doktoranturada tədqiqat işi çərçivəsində İT təhlükəsizliklə bağlı yazdığı elmi məqaləyə də kitabda yer verilib.

Qeyd edək ki, “Computer and Information Security Handbook” , Elsevier nəşriyyat evinin orqanı olan Morgan Kaufmann tərəfindən artıq üçüncü dəfədir nəşr olunur.

Kitabın ilk iki nəşriyyatı 2009 və 2013-da işıq üzü görüb. Belə ki, kitab bir üzlük altında İKT təhlükəsizliyin, demək olar ki, bütün sahələrini əhatə edən mövzulara aid olan fəsillərdən (chapters) ibarətdir. Bu fəsillərdə kompüter və ümumi kibertəhlükəsizlik nəzəriyyərləri, tətbiqi və təcrübələri, o cümlədən son texnologiyalar, trendlər və təhlükəsi getdikcə artan sahələr haqqında müxtəlif müəlliflər tərəfindən yazılmış məqalələr verilib.

Nəşrin 7-ci bölməsinin mövzusu məlumatın gizliliyi və girişin idarəetməsinə aiddir ("Privacy and Access Management"). Həmin bölmədəki "Kontekst əsasında çox-faktorlu identifikasiya" (Chapter 50 - Context-based Multi-factor Authentication) fəsilin müəllifi isə həmyerlimiz Emin Hüseynova məxsusdur.

Kitab haqqında daha ətraflı burada.

Emin Hüseynov 1997-1998-ci illərdən informasiya texnologiyaları sahəsində çalışır. O, Azərbaycanda İT-nin, İnternetin inkişafına xeyli töhfələr verib. Azərbaycan dilində bir neçə proqram təminatlarının müəllifidir. Windows 95, Windows 98 üçün ilk Azərbaycan klaviaturasını da o yaradıb. Eyni zamanda Azərbaycan dilində yaradılan bir neçə sayt, dərsliklərin müəllifi, Azərbaycan dilində ilk ofis proqramının (Microsoft office proqramının pulsuz analoqu olan OpenOffice.org) və əməliyyat sisteminin (Linuks əsaslı Lin.az) layihə rəhbəri olub. Hazırda isə Cenevrə şəhərində yerləşən BMT-nin Uşaq Fondu – UNİCEF-in Avropa qərargahında sistem inzibatçısı vəzifəsində çalışır.

Məltəm Talıbzadə