Azərbaycanın telekommunikasiya və poçt xidmətləri üzrə tənzimləyici qurumu İnformasiya Kommunikasiya Texnologiyaları Agentliyi (İKTA) internet və telekommunikasiya xidmətləri göstərən operator və provayderlərin abunəçilərlə operativ əks-əlaqə imkanları, şəxsi kabinet və informasiya sistemlərinin mövcudluğu ilə bağlı geniş təhlillər aparıb.
Xeberler.az məlumat verir ki, aparılan araşdırmalar nəticəsində bəzi operator və provayderlərin elektron informasiya sistemlərinin mövcud olmadığı, mövcud olanlarda isə şəxsi kabinet funksiyalarının ya ümumiyyətlə təqdim edilmədiyi, ya da tam funksional işləmədiyi müəyyən olunub.
İKTA bildirib ki, operator və provayderlərin məlumatlandırma, operativ cavablandırma, xidmət keyfiyyətinin təmin edilməsi və istehlakçı hüquqlarının qorunması baxımından belə mexanizmlər mühüm əhəmiyyət daşıyır. Qanunvericiliyə əsasən, abunəçilərin xidmətlər barədə dolğun məlumat almaq, müraciətlərini rahat şəkildə təqdim etmək və müəyyən edilmiş müddətdə cavab əldə etmək hüquqları mövcuddur.
Qeyd olunub ki, müasir telekommunikasiya xidmətləri yalnız internet bağlantısının təqdim olunması ilə məhdudlaşmamalı, eyni zamanda istifadəçilərlə şəffaf, operativ və izlənilə bilən kommunikasiya imkanlarını da əhatə etməlidir.
Bu məqsədlə İKTA tərəfindən operator və provayderlərə rəsmi internet resurslarının, şəxsi kabinetlərin və elektron müraciət sistemlərinin tam şəkildə təmin edilməsi tövsiyə olunub. Agentlik bu istiqamətdə tədbirlərin davam etdirildiyini bildirib.
Məlumata görə, növbəti mərhələdə istifadəçilərə şəffaf və operativ əlaqə mexanizmləri təqdim etməyən operator və provayderlərlə bağlı ictimaiyyətin daha geniş məlumatlandırılması və qiymətləndirmə tədbirlərinin həyata keçirilməsi planlaşdırılır.
Eyni zamanda, agentlik internet xidmətlərində problem yarandıqda istifadəçilərə ilk növbədə xidmət təchizatçılarının rəsmi əlaqə vasitələrinə müraciət etməyi, zərurət olduqda isə “mygov” platforması üzərindən təqdim olunan “E-Şikayət” xidmətindən istifadə etməyi tövsiyə edir.
