İnformasiya Texnologiyaları İnstitutu hosting xidməti göstərir
Son dövrlərdə AzScienceNet elm kompyuter şəbəkəsinin (EKŞ)
infrastrukturunun müasir kompyuter avadanlığı və yeni texnologiyalar
əsasında qurulması şəbəkədə yeni xidmət sahələrinin yaradılmasına geniş
imkanlar yaratmışdır.
Azərbaycan Milli Elmlər Akademiyasının (AMEA) İnformasiya
Texnologiyaları İnstitutundan AzərTAc-a bildirmişlər ki, internet
şəbəkəsinə çıxış sürəti 150 Mb/saniyə olan AzScienceNet EKŞ fasiləsiz
qida mənbəyi, yanğından mühafizə, kondisioner sistemləri və s. ilə
təchiz edilmişdir. Bütün bunlar şəbəkənin 24 saat ərzində istifadəçilərə
yüksək səviyyədə fasiləsiz xidmət etməsinə imkan yaradır.
Bu imkanlar nəzərə alınaraq İnformasiya Texnologiyaları İnstitutu
tərəfindən AzScienceNet elm kompyuter şəbəkəsinin serverlərində AMEA-nın
institut və təşkilatlarına veb-resurslarının təmənnasız olaraq
yerləşdirilməsi və onlara hosting xidmətlərinin göstərilməsi təklif
edilir.
Bu xidmətdən istifadə etmək üçün AMEA İnformasiya Texnologiyaları
İnstitutunun rəhbərliyinə rəsmi müraciət edilməsi xahiş olunur.
