TƏDBİRLƏR

Verilənlərin emalı mərkəzində yaddaş və hesablama resurslarının optimal paylanması üzrə metodların işlənilməsi, AzScienceNet elm kompüter şəbəkəsində “Enterprise Desktop Grid” xidmətlərinin yaradılması və bulud texnologiyalarında istifadəçilərin məlumatlarının yaddaş qurğularında dinamiki paylanması məsələləri, AzScienceCert-də toplanan məlumatlar əsasında təhlillərin aparılması, AzScienceNet-də hostinq xidmətlərinin yaradılmasına qoyulan tələblərin işlənilməsi istiqamətində elmi-tədqiqatlar davam etdiriləcək.

Xeberler.az-ın məlumatına görə, bu barədə AMEA İnformasiya Texnologiyaları İnstitutunun texnologiyalar üzrə direktor müavini, texnika üzrə fəlsəfə doktoru Rəşid Ələkbərov rəhbərlik etdiyi şöbənin 2016-cı il üçün fəaliyyət planı ilə bağlı çıxışı zamanı bildirib.

R.Ələkbərov cari ildə şöbədə planlaşdırılmış işlər haqqında məlumat verərək superkompüter texnologiyalarının mövcud vəziyyəti, inkişaf perspektivləri, onlarda həll olunan  məsələlərin analizi və təhlillərin aparılması, şəbəkə mühitində bulud servislərinin sintezi üçün metod və alqoritmlərin işlənilməsinin nəzərdə tutulduğunu qeyd edib.

Elmi-innovasiya fəaliyyəti çərçivəsində görüləcək işləri diqqətə çatdıran məruzəçi “Elektron elm və onun funksional altsistemlərinin sintezi üçün yeni metod və alqoritmlərin işlənilməsi” qrant layihəsi üzrə elmi-tədqiqatların  davam etdiriləcəyini deyib.

Direktor müavini AzScienceNet-in infrastrukturunun genişləndirilməsi və şəbəkədə yeni xidmətlərin təşkili işlərindən danışıb.

O qeyd edib ki, şəbəkənin infrastrukturunun intellektual kommutatorlar əsasında yenidən qurulması, AzScienceNet üzərindən ElmTV İnternet televiziyasının monitorlar şəbəkəsinin yaradılması və istismarı, AMEA-nın elmi müəssisə və təşkilatlarının AzScienceNet-ə fiberoptik əlaqə kanalları vasitəsilə qoşulması, AzScienceNet-in analoji şəbəkələrlə (MDB ölkələri üzrə) müqayisəli təhlili  və analizin aparılması işlərinin davam etdirilməsi planlaşdırılır.

O, həmçinin AzScienceNet-in texniki imkanlarının genişləndirilməsi məqsədilə yaddaş və hesablama resurslarının artırılmasından söz açaraq şəbəkənin internetə çıxış sürətinin 400 Mbit/s-ə çatdırılmasının nəzərdə tutulduğunu vurğulayıb.

AzScienceNet üzərindən AMEA-nın Gəncə və Naxçıvan bölmələri üçün çoxnöqtəli distant tədris xidmətinin, İnternet üzərindən onlayn TV yayımının təşkili, AzScienceNet-də “Mutlimedia Qalereyası” sisteminin yaradılması və istismarı işləri, “Everest” və “BOİNC” platformaları əsasında paylanmış hesablama sistemlərinin, o cümlədən “Desktop GRİD” sisteminin yaradılması istiqamətində birgə işlərin aparılması, AzScienceNet-də Cloud Computing xidmətindən istifadə edilməsinin təşkili və s. ilə bağlı tədbirlərin həyata keçiriləcəyi bildirilib.

Şöbənin beynəlxalq elmi əməkdaşlıq əlaqələrinin inkişafı məsələsinə toxunan məruzəçi Avropa üzrə bütün elm və təhsil qurumlarına şəbəkə xidməti göstərən GEANT assosiasiyası və Rusiya Elmlər Akademiyasının A.A.Xarkeviç adına İnformasiyanın Ötürülməsi Problemləri İnstitutunun Paylanmış Hesablamalar Mərkəzi ilə əməkdaşlıq münasibətlərinin davam etdiriləcəyini nəzərə çatdırıb.

 Xeberler.az