E - HÖKUMƏT

Məktəblərarası İnformatika Layihə Olimpiadasında iştirak etmək üçün qeydiyyat müddəti aprelin 20-ə qədər uzadılıb.

Xəbərlər.az İnformatika Layihə Olimpiadasının rəsmi saytına istinadən xəbər verir ki, yarışda yalnız 10 Aprel 2015-ci il tarixə qədər online qeydiyyatdan keçən orta məktəb şagirdləri iştirak edə bilərlər.

Qeydiyyatdan keçdikdən sonra əsas menyudan HESABIM bölməsinə girərək, tələb olunan bütün məlumatların doldurulması lazımdır.

PROFİLİM bölməsi qeydiyyat tarixi bitənə qədər aktiv olacaq və istənilən dəyişikliyi edə biləcəklər.

Yarış “Veb səhifə”, “Animasiya”, “Proqramçılıq”, “Robot”, “Qısa film” kateqoriyaları üzrə təşkil olunur. “Veb səhifə”, “Animasiya”, “Proqramçılıq” və “Robot” kateqoriyalarında tək və ya qrup şəklində (2 nəfərdən artıq olmamaq şərtilə) iştirak etmək olar.

İstər tək, istərsə də qrup şəklində hazırlanan və qalib gələn layihəyə bir mükafat və bir medal veriləcək. Qrupda iştirak edəcək şagirdlər eyni kateqoriyadan olmaq şərtilə fərqli məktəblərdən ola bilərlər.

Layihələr yalnız qatılan şəxsin (və ya şəxslərin) iştirakı ilə hazırlanmış olmalıdır. Layihələrdə qanunlara zidd, siyasi mövzulara, həddən artıq şiddətə, ədəbsiz, 18+ mövzulara, tənqidə, təhqirə, hər hansı bir şəxsiyyətin alçaldılmasına yer verilməməlidir. Bütün kateqoriyalardan istənilən mövzuda layihə hazırlamaq olar. “Animasiya” və “Qısa film” 5 dəqiqədən çox olmamalıdır.

Finala seçilən layihələr aprel ayında yarışın internet səhifəsində elan olunacaq. Finala qalan iştirakçılar finalçılar elan edildikdən sonra www.ilo.az”-da veriləcək ölçüdə poster hazırlamalı və çap etdirməlidirlər. 

İLO orta məktəb şagirdlərinin İKT sahəsində bilik və bacarıqlarının inkişafına yönəldilmiş layihə yarışıdır və Rabitə və Yüksək Texnologiyalar Nazirliyi (RYTN), AMEA İnformasiya Texnologiyaları İnstitutu, AMEA İdarəetmə Sistemləri İnstitutu, Qafqaz Universiteti və “İstək” liseyinin təşkilatçılığı və sponsorluğu ilə keçirilir. Məqsəd respublikanın İT və kompüter texnologiyaları sahəsində ən bacarıqlı şagirdlərini bir araya gətirmək, orta məktəb şagirdlərinin bu sahədə xəyal güclərini və maraqlarını artırmaq, nəzəri biliklərinin bacarıqları ilə nümayiş etdirilməsini təmin edərək, təcrübə qazanmalarına təkan vermək və inkişaf etməkdə olan Azərbaycanın gələcəyi üçün İKT sahəsi üzrə güclü mütəxəssislərin yetişməsinə imkan yaratmaqdır.

Mirvari Nəcəf