İNTERNET

Gələn il ölkədə ilk dəfə olaraq İT yönümlü ixtisas seçənlər kimya əvəzinə informatikadan qəbul imtahanı verəcəklər.

Xeberler.az bildirir ki, bu barədə Azərbaycan İnternet Forumunun Prezidenti, ekspert Osman Gündüz öz “Facebook” səhifəsində paylaşım edib.

“Bununla əlaqləli vəziyyət necədir və hansı gözləntilər var?

Məhz bu tip suallara cavab axtarmaq üçün DİM-in informatika fənni üzrə işçi qrupunun üzvləri ilə Azərbaycan Texniki Universitetinin İKT yönümlü fakültələrinin əməkdaşları arasında görüş keçirilib.

Görüş çox maraqlı oldu və bir çox məsələlərə aydınlıq gətirildi.

DİM-in işçi qrupu tərəfindən bir il sonra baş tutacaq ilk informatika imtahanına hazırlıqla bağlı bir xeyli işlərin görüldüyü haqqında məlumat verildi.

Görüş haqqında geniş açıqlama verildiyindən qısa olaraq qərar qəbul edənlərin diqqətinə aşağıdakıları çatdırmaq istərdim :

1. İnformatikadan imtahan hazırlığında indiki mərhələdə Təhsil Nazirliyinin üzərinə böyük yük düşür.

DİM artıq özündən asılı olan əsas işi edib, informatikadan qəbul imtahanını təsdiqləyib və hazırlıq prosesi davam edir.

Yəni, DİM qiymətləndirməyə hazırdır.

Amma görəsən gələn il məktəblərdən gələnlərin informatika hazırlığı necə olacaq?

Ümumiyyətlə, İnformatikanın tədrisi necədir? Yeni imtahan modeli ilə bağlı İnformatikanın tədris keyfiyyətini yüksəltmək üçün planlar varmı?

Şəxsən mən ehtiyat edirəm ki, gələn il informatikadan imtahanın nəticəsi bir müddət öncə 9-cu siniflərin riyaziyyat(kurikulum) nəticəsi kimi acınacaqlı olar.

Odur ki, fikrimcə elə indidən Təhsil Nazirliyi İnformatika ilə əlaqəli bütün resursları səfərbər etməlidir

2. Hazırda Təhsil Nazirliyi İnformatika ilə bağlı bir xeyli məktəbə, "Rəqəmsal bacarıqlar" və s. layihələrlə , əlavə güclü resurslar xərcləməklə keyfiyyətə ciddi təsir edə bilib.

Amma maraqlıdır ki, dövlət resursları hesabına İnformatikadan hazırlıq vəziyyətinə kəskin təsir edə biləcək bu amil ilk İnformatika imtahanından sonrakı durumda necə nəzərə alınacaq?

3. İnformatika tədris olunmayan və ya İnformatikanın digər ixtisasll müəlimlər tərəfindən tədris olunan məktəblər (bu tip məktəblər isə yetərincədir) müəyyən olunmalıdır.

İnformatika imtahanını nəzərə alaraq qarşıdakı dövrdə bu tip məktəblərin kadrlarla təminatına xüsusi diqqət yetirilməlidir

4. Artıq məktəblərdən daha savadlı, kod yaza bilən uşaqlar ali məktəblərə daxil olacaq və getdikcə onların sayı artacaq . Universitetlərin buna hazır olması üçün ali məktəb müəllimlərinin peşəkarlığının artırılmasına ciddi diqqət yetirilməlidir.

5. DİM və Təhsil Nazirliyi İnformatikadan imtahana hazırlığı yüksəktmək üçün əlavə resursların, vəsaitlərin hazırlanmasına xüsusi önəm verməlidir

6. İnformatika sahəsində bacarığı olanları, İT yönümlü ixtisaslar olan Universitetlərin əməkdaşlarını DİM-lə , Təhsil Nazirliyi ilə daha güclü əməkdaşlığa çağırıram.

DİM , həmçinin AzTU bu sahəyə cəlb olunan markerlər(müəllimlər, doktorantlar, magistirlər və s) üçün əlavə ödənişlər ediləcəyini açıqlayıb.

DİM artıq bu məqsədlə elektron sistem də qurub.

7. Təhsil kurslarından, yenicə formalaşmaqda olan informatika üzrə repetitorlardan da xahişimiz odur ki , bir ildən sonra baş tutacaq ilk informatika qəbul imtahanına hazırlığa indidən başlasınlar. DİM-in model testlərini və vəsaitlərini əldə etsinlər. Əlavə vəsaitlərin hazırlanmaısını da tövsiyə edərdik.

Valideynlər arasında bu istiqamətdə maarifçilik işlərinin gücləndirilməsi də faydalı olardı.”