Ekspert: İnformatika, yoxsa Kimya? məsələsi hələ də öz həllini tapa bilmir

14-04-2021 / 18:07
İnformatika, yoxsa Kimya ?
 
"Azərbaycanın rəqəmsal dünyasının ən absurd qərarlarından biri: İnformatika müəllimliyi ixtisasını seçənlər İnformatikadan deyil Kimyadan qəbul imtahanı verməlidir".
 
Xeberler.az məlumat verir ki, bu sözləri Azərbaycan İnternet Formunun Prezidenti, ekspert Osman Gündüz deyib:
 
"Son zamanlar rəqəmsal sektorda uzun illər həllini gözləyən problemləri bir daha xatırladıram. Baxıram ki, bizim rəqəmsal problemlərimiz də xeyli “qocalıb”.
 
Uzun illərdir ali məktəblərə qəbulda “İnformatika, yoxsa Kimya” problemi də öz həllini tapa bilmir. Dəfələrlə bu məsələ DİM və Təhsil Nazirliyi qarşısında qaldırılb.
Uzun-uzadı müzakirələr aparılıb.
 
Belə görünür ki, bu il də İKT yönümlü ixtisası seçənlər, İnformatika müəllimliyini seçənlər, Proqramlaşdırma ixtisaslarını seçənlər İnformatika əvəzinə Kimyadan qəbul imtahanı verəcəklər. Deməli, hələ də DİM və Təhsil Nazirliyi bununla bağlı daxili problemlərini həll edə bilməyiblər.
 
Situasiya isə təxminən belədir:
 
DİM deyir ki, texnoloji ixtisaslara İnformatikadan imtahan götürülərsə əksəriyyət kəsiləcək. DİM düşünür ki, bu Təhsil Nazirliyinin problemidir, məktəblərdə İnformatikanın tədrisi yetərli olmadığından, şagirdlərin bilik və bacarıqları da qənaətbəxş deyil".
 
Ekspertin sözlərinə görə, Təhsil Nazirliyi deyir ki, bu DİM-in problemidir, gərək DİM İnformatikanı imtahan olaraq daxil etsin ki, məktəblərdə, valideynlərdə və şagirdlərdə bu fənnə diqqət artırılsın:
 
"Əlbəttə, DİM-in elmi-statistik təhlillərindən görsənir ki, məktəblərdə nəinki informatikanın, elə riyaziyyatın da tədrisində ciddi problemlər var.
 
Amma nəzərə almaq lazımdır ki, MİQ müsabiqələrindən sonra İnformatikanın tədrisi məktəblərdə xeyli yaxşılaşıb.
 
Və beləliklə də, iki dövlət qurumunun ortaq məxrəcə gələ bilməməsi səbəbindən uzun illərdir ki problem həll olunmadan qalır.
 
Bir müddət öncə DİM riyaziyyatdan bəzi imtahan tapşırıqlarının İnformatika fənni üzrə ola biləcəyini açıqlasa da sonradan bunlar da unuduldu.
 
Ötən illərdə hökumət İKT yönümlü ixtisasların təsnifatını xeyli təkmilləşdirib. Yeni İT ixtisaslar, mexatronika və robototexnika, radiotexnika, aerokosmik, elektronika və telekommunikasiya mühəndisliyi və s. bu kimi ixtisaslar var".
 
Son olaraq Osman Gündüz bildirib ki, hökumət DİM və Təhsil Nazirliyini, rəqəmsal inkişafa cavabdeh olan dövlət qurumalrını bir araya gətirərək, normal müzakirələr təşkil etməli və 4-cü Sənaye inqilabının çağırışlarını, rəqəmsal transformasiyanın tələblərini nəzərə alarq İT yönümlü ixtisasların olduğu 1-ci Qrupun imtahanlarında Kimya fənnini İnformatika ilə əvəzləməlidir.

ŞƏRHLƏR






sorğu
İT mütəxəssislər iş yerlərini hansı meyarlar əsasında seçir ?
  • Şirkətin yüksək statusuna görə
  • İşin, layihənin xarakterinə görə
  • Əmək müqaviləsinin olmasına görə
  • Yüksək əmək haqqına, mükafatlara və digər güzəştlərə görə
  • Gələcək karyerası üçün əhəmiyyət kəsb etdiyinə görə
  • Maraqlı, işgüzar kollektivə görə