Hansı prioritetdir İnformatika yoxsa Kimya ?

09-08-2019 / 10:29

Xeberler.az bildirir ki, bu il Beynəlxalq İnformatika Olimpiadasına Azərbaycan ev sahibliyi edir.  Lakin ölkəmiz üçün nəticələr elə də ürəkaçan olmayıb. Digər illərdə olduğu kimi Azərbaycan yarışı medalsız başa vurub.

Bununla bağlı Azərbaycan İnternet Formunun Prezidenti, İT üzrə ekspert Osman Gündüz açıqlama verib. O, uğursuzluğun səbəbini hazırlıq işlərinin yetərli olmamasında görür.

Ekspert bildirib: "2015-ci ildən məlumdur ki İOİ-a Azərbaycan ev sahibliyi edəcək. Buna baxmayaraq 3 il müddətində ciddi hazırlıq görülmədi və yarışlarda uğur qazana bilmədik . Hazırlıqlar yarışa bir il qalmış başlandığı üçün vaxt çox az idi. Əgər ötən il "medalın" bir addımlığlnda olan iştirakçımız yenə də həmin nəticəni göstərirsə demək onun hazırlığının təşkili yetərli olmayıb". 

Osman Gündüz məsələnin kökündə dayanan səbəbləri açıqlayıb.

"Tədris prosesində və ali məktəblərə qəbulda informatikanın rolu düzgün qiymətləndirilməyib, ənənə formalaşmayıb və oturuşmuş informatika məktəbi yoxdur. Biz hamılıqla, hökumət, məktəb, müəllim və valideyn olaraq, şagird 9-cu sinfə çatanda məqəsdyönlü olaraq informatikanın evini yıxırıq. İnformatika 1-ci sinifdən tədris olunur. Aydındır ki? başqa ölkələrdə olduğu kimi bizdə də aşağı siniflərdə informatikaya, texniki-texnoloji sahəyə meylli xeyli uşaqlar olur. Bu uşaqlar 8-ci sinfə qədər İT sahəsi üzrə bilik -bacarıqlarını hər gün təkmilləşdirirək inkişaf edirlər.  9-cu sinifdə isə situasiya dəyişir. Məlumdur ki, mövcud təhsil sisteminə görə 9-cu sinifdə hər bir məktəbdə və hər bir evdə artıq şagirdin hansı ali məktəbə, hansı ixtisas sahəsinə gedəcəyi müəyyən olunur. İT istiqamətdə inkişaf edən uşaqlar da təbii ki İT və Kompüter elmləri üzrə ixtisası seçirlər. Ali təhsil müəssisələrinə qəbul Qaydalarına görə İT və Kompüter ixtisaslarını seçənlər informatikadan deyil kimyadan qəbul imtahanı verməlidirlər. Bu səbəbdən valideynlər və müəllimlər 9-cu sinifdə şagirdin informatika sahəsindəki fəaliyyətini dayandırır. Baxmayaraq ki, uşaq İT sahəsini seçib lakin o bütün vaxtını və enerjisini kimya və digər fənlərə yönəldir. İnformatika isə bir fənn olaraq məktəb üçün, valideyn üçün əhəmiyyətsiz bir predmetə çevrilir". 

"Bu səbəbə görə, 9-cu ildir ki informatika üzrə beynəlxalq yarışlarda uğursuzluq bizi izləyir. Hətta təmayülləşmə xətti də bu sahədə özünü doğrultmayıb. Çünki şagird İT üzrə təmayülləşməni seçsə də, kimyadan qəbul imtahanı “damokl qılıncı” kimi başının üstünü kəsdirib"- deyə Osman Gündüz bildirib.

Sonda ekspert məsələnin həlli yollarından danışıb:

"Məktəbdə, evdə və cəmiyyətdə İnformatikaya münasibəti dəyişməliyik. Bunun yolu isə mütləq şəkildə Ali məktəblərdə qəbulda İT üzrə ixtisaslarda kimyadan deyil informatika fənnindən imtahan salınmasındadır. İnformatika üzrə normal kurikulum sistemi hazırlanmalı və vəsaitlər olmalıdır. Informatika üzrə kadr hazırlığına xüsusi önəm verilməlidir. Dövlət İmtahan Mərkəzi bildirir ki, əgər informatika fənnindən imtahan salınarsa, orta məktəblərdə informatikanın tədrisi zəif olduğu üçün böyük əksəriyyək imtahandan kəsiləcək.  Təhsil Nazirliyi isə qeyd edir ki, informatikadan imtahan salınmalıdır ki, məktəbin və valideynin diqqəti informatikaya yönəlsin. Bu cür yanaşma ilə biz uzağa gedə bilmərik. Hər iki qurum bir araya gəlib problemi həll etməlidirlər. Düşünürəm ki, Dövlət İmtahan mərkəzi imtahan sisteminin dəyişməsinə, Təhsil Nazirliyi isə yeni resursların hazırlanmasına diqqət yetirəcək".




ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.