RƏQƏMSAL DÜNYA

Mayın 8-də “Delta Telekom LTD” MMM provayderlərə təmin olunan internetin qiymətində təxminən 70 faizə qədər endirim etməklə bağlı qərar qəbul edib. Lakin qəbul olunmuş qərara baxmayaraq internetin vətəndaşlara satış qiymətində heç bir ucuzlaşma görünmür.

Xeberler.az Cebhe.info-ya istinadən bildirir ki, "Multimedia İnformasiya Sistemləri Texnologiyaları Mərkəzi"nin direktoru, Azərbaycan İnternet Forumunun prezidenti Osman Gündüz deyib ki, pərakəndə satışda ucuzlaşma yoxdur:

“70% ucuzlaşma topdan satışa aid idi. Hansı ki, “Delta Telekom LTD” topdan satış edən iki provayderdən biridir. Pərakəndə satışda bu yoxdur. Bunun da səbəbləri aydındır, çünki Azərbaycan internet bazarının 50 faizə qədəri dövlət provayderlərinin əlindədir.

Dövlət provayderlərinə də Nəqliyyat, Rabitə və Yüksək Texnologiyalar Nazirliyi rəhbərlik edir. Biz dəfələrlə məsələ qaldırsaq da, nazirlik 70% qiymət endirimini özünün 2 dövlət provayderinə tətbiq etmədi. Dövlət provayderləri də ucuzlaşmanı tətbiq etmədikdə, özəl provayderlər də gözləmə mövqeyindədirlər. Hesab edirəm ki, bu məsələ nazirliyin istəyindən asılı olaraq qalıb”.

İnternetin keyfiyyət məsələsinə də toxunan Osman Gündüz bildirib ki, bunun iki səbəbi ola bilər:

Problem həm xətlərdə, həm də satış provayderlərində ola bilər. Ümumiyyətlə bizdə internetin sürəti ilə bağlı problem var. Bəzən provayderlər bilərəkdən sürəti azaldırlar.

Azərbaycanda genişzolaqlı internet istifadəçilərinin sayını artırmaq lazımdır. Nəqliyyat, Rabitə və Yüksək Texnologiyalar Nazirliyi genişzolaqlı internet istifadəçilərinin sayını artırmaq üçün özəl provayderlərə şərait yaratmalıdır”.