TƏHLİL VƏ RƏYLƏR

Koronavirus epidemiyasının yaratdığı vəziyyətlə əlaqədar olaraq, təhsil onlayn formada davam etdirildi. Lakin mütəxəssislər bildirirlər ki, şagirdlərin yalnız 30-35 faizi online dərslərə cəlb oluna bilib və çox az hissə elektron resurslardan istifadə edib. Səbəb isə internetin yaratdığı məhdudiyyətlərdir. İnternet tariflərində güzəştlər olarsa, bu rəqəmləri 70-80 faizə qədər çatdırmaq mümkündür. Bunun üçün mobil operatorlar və interenet provayderləri karantin müddətində internet qiymətlərinə yenidən baxmalıdırlar. 

Bəs, internet qiymətlərində güzəştlərin edilməsi mümkündürmü? 

Xeberler.az bildirir ki, Azərbaycan İnternet Forumunun (AİF) prezidenti Osman Gündüz qeyd edib ki, Azərbaycanda internet qiymətlərini bazar müəyyən etmir. Bunu dövlət sektoru müəyyənləşdirir:

"Azərbaycanda internetin qiymətinin formalaşmasına təsir edən amil dövlət provayderləri, dövlət sektorudur. Bazar bunu müəyyən etmir. Çünki internet bazarında dövlət provayderlərinin xüsusi çəkisi 50 %-dən yuxarıdır. “Aztelekom”,  “Baktelecom”, “Azercell” - bunlar dövlət provayderləri hesab olunur. Dövlət provayderləri pərakəndə internet bazarının 60%-dan çoxuna nəzarət edir. Belə olan halda necə bazar müəyyən edə bilər? Bir tərəfdə nəhəng dövlət sektoru, digər tərəfdə isə 30 % özəl şirkətlər".

O.Gündüz qeyd edib ki, internetin qiymətlərində güzəştlərin edilib-edilməməsi birbaşa dövlət provayderlərinin məsələyə yanaşmasından asılıdır:

"Məsələn, bir müddət öncə "Delta Telecom" (topdansatış həyata keçirən "backborn" şirkət) bildirmişdi ki, provayderlərə satdığı internetin qiymətini endirəcək. Əgər provayderlər topdansatışla interneti ucuz alsaydı, istifadəçilərə də ucuz qiymətə satacaqdı. Amma dövlət provayderləri bildirdilər ki, "xeyir, biz ucuz alsaq da qiymətləri endirməyəcəyik". Topdansatış həyata keçirən "backborn" provayderin təşəbbüsü iflasa uğradı. Çünki dövlət provayderləri onu blokadaya aldılar. Bu baxımdan düşünmürəm ki, bazarda tələb və təklif internetin qiymətinə təsir göstərsin. Bunu birmənalı şəkildə, Nəqliyyat, Rabitə və Yüksək Texnologiyalar Nazirliyinin tabeliyində olan dövlət provayderlərinin münasibəti həll edə bilər".