TƏDBİRLƏR

Məlumat verdiyimiz kimi, bir müddətdir ki, ölkədə dil məsələləri ilə bağlı Qaynar xətt sistemi yaradılması istiqamətində işlər davam edir.

Qaynar xətt xidməti artıq sınaq  fəaliyyətinə başlayıb.

Hazırda bu istiqamətdə görülən işlərdən danışan Azərbaycan Milli Elmlər Akademiyası (AMEA) Nəsimi adına Dilçilik İnstitutunun Monitorinq şöbəsinin müdiri, professor Qulu Məhərrəmli Xeberler.az-a bildirib ki, Qaynar xətt  iki həftə sınaq fəaliyyəti göstərəcək.

Onun sözlərinə görə, hazırda sınaq müddəti olsa da, sistem fəaliyyət göstərir və istənilən adam zəng edib məlumat verə və ala bilər.

Qulu Məhərrəmli bildirirb ki, Qaynar Xətt yeddirəqəmli və avtomatik sistemdir . Xidmətin  nömrəsi 012 538 06 37-dir, sistem 24 saat fasiləsiz işləyir. Hazırda sistemdə 3 nəfər çalışır.

O deyib ki, bütün zənglər qeydiyyata alınır. Zənglərin günlük, həftəlik, aylıq statistikası aparılacaq.

Qeyd edək ki, dil məsələləri ilə bağlı yaradılan sistemdə quraşdırılmış robot müraciət edən vətəndaşa dərhal cavab verəcək və vətandaşın qeydi, iradı qəbul ediləcək. Bir gün sonra isə vətəndaşla əlaqə saxlanılacaq və məsələ həll olunacaq.

Bu fəaliyyət  Prezident İlham Əliyevin 2013-cü il 9 aprel tarixli Sərəncamı ilə “Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı” a əsasən həyata keçirilir. Məhz bu Proqramda dilçiliyin inkişafı və ölkədə dildən istifadənin inkişaf etdirilməsi ilə bağlı mühüm əhəmiyyətli məsələlər öz əksini tapıb.

Məltəm Talıbzadə