TƏHLÜKƏSİZLİK

Elm və Təhsil Nazirliyi İnformasiya Texnologiyaları İnstitutunun elmi seminarında “Kritik texnoloji sistemlərin kibertəhlükəsizliyinin təmin edilməsi üçün intellektual metod və alqoritmlərin işlənməsi” mövzusunda yerinə yetirilən tədqiqatlara dair müzakirələr aparılıb.

Xeberler.az bildirir ki, bu barədə institutdan məlumat verilib.

Mövzuya dair çıxış edən institutun doktorantı Qurban Fərəcov dissertasiya işinin aktuallığı, məqsədi, qarşıya qoyulmuş məsələlər haqqında məlumat verib. Kritik texnoloji sistemlərin Dördüncü Sənaye İnqilabının əsas texnoloji dayaqlarından biri olduğunu deyən tədqiqatçı ölkələrin bu sistemlərin təhlükəsizliyinin təmin olunmasını öz milli maraqlarının qorunması məsələsi hesab etdiklərini bildirib.

Məruzəçinin sözlərinə görə, kritik sistemlər müxtəlif kiber və fiziki komponentlərdən ibarətdir. Ayrı-ayrı komponentlərlə edilən ikitərəfli məlumat mübadiləsi zamanı müxtəlif kiberhücumlar bu komponentlərin işində problemlər yarada bilir. O deyib ki, bir çox hallarda kritik sistemlərin təhlükəsizliyinin təmin olunması xüsusi yanaşma tələb edir.

Daha sonra mövzu ətrafında fikir mübadiləsi aparılıb, çoxsaylı suallar cavablandırılıb.

AMEA-nın vitse-prezidenti, institutun baş direktoru akademik Rasim Əliquliyev kritik texnoloji sistemlərin kibertəhlükəsizliyinin təmin edilməsi istiqamətində tədqiqatların dərinləşdirilməsini, məqalələrin hazırlanaraq nüfuzlu jurnallara təqdim olunmasını tövsiyə edib. Akademik, həmçinin texnoloji sistemlərin kritikliyini müəyyən edən xüsusiyyətlərin, o cümlədən bu sahədə beynəlxalq standartların dərindən araşdırılması ilə bağlı təkliflərini səsləndirib.